دنیا بھر میں مائیکروسافٹ کی سروسز میں خلل، آؤٹ لک، ٹیمز اور کوپائلٹ متاثر

عالمی خبر (پاک ٹوڈے): دنیا بھر میں مائیکروسافٹ کی مختلف آن لائن سروسز میں تکنیکی خرابی کے باعث صارفین کو شدید مشکلات کا سامنا کرنا پڑا، متاثرہ سروسز میں آؤٹ لک، مائیکروسافٹ ٹیمز اور مصنوعی ذہانت پر مبنی سافٹ ویئر کوپائلٹ بھی شامل ہیں۔

مائیکروسافٹ نے سروسز میں تعطل کی تصدیق کرتے ہوئے کہا ہے کہ کمپنی کنکشن کے مسائل دور کرنے کے لیے کام کر رہی ہے۔

کمپنی کے مطابق اس کے انفرااسٹرکچر کے ایک حصے پر غیر معمولی دباؤ بڑھنے سے صارفین کو مختلف سروسز تک رسائی میں مشکلات پیش آئیں۔

مائیکروسافٹ کا کہنا ہے کہ یہ مسئلہ صارفین کی جانب سے ٹریفک میں اضافے کے باعث پیدا نہیں ہوا بلکہ متعدد سرورز اچانک دستیاب نہ ہونے کی وجہ سے باقی سرورز پر دباؤ بڑھ گیا، جس کے نتیجے میں سروسز متاثر ہوئیں۔

آؤٹیج کی نگرانی کرنے والی ویب سائٹ ڈاؤن ڈیٹیکٹر کے مطابق امریکا اور برطانیہ میں بڑی تعداد میں صارفین نے سروسز میں خرابی کی شکایات درج کرائیں۔ صرف امریکا میں آؤٹ لک کی بندش سے متعلق ایک لاکھ 31 ہزار سے زائد شکایات سامنے آئیں۔

مائیکروسافٹ کے مطابق تکنیکی مسئلے کے حل کے لیے سرورز کی ترتیبات میں تبدیلیوں کا تجربہ کیا جا رہا ہے تاکہ سرورز کی خودکار جانچ کے دوران پیدا ہونے والی خرابی کو دور کیا جاسکے۔

سروسز میں تعطل کے باعث دنیا بھر میں متاثرہ صارفین کو ای میلز، آن لائن میٹنگز اور دیگر ڈیجیٹل سہولیات کے استعمال میں مشکلات کا سامنا کرنا پڑا۔