مسقط (پاک ٹوڈے): انڈر 19 ایشیا کپ کے فائنل میں بھارت نے سنسنی خیز مقابلے کے بعد پاکستان کو ایک وکٹ سے شکست دے کر ٹائٹل اپنے نام کر لیا۔ بھارتی ٹیم نے پاکستان کی جانب سے دیا گیا 338 رنز کا ہدف آخری گیند پر حاصل کیا۔
مسقط میں کھیلے گئے فائنل میں پاکستان نے ٹاس جیت کر پہلے بیٹنگ کا فیصلہ کیا اور مقررہ 50 اوورز میں 9 وکٹوں کے نقصان پر 337 رنز بنائے۔
پاکستان کی جانب سے عثمان خان اور عبدالقادر نے شاندار بیٹنگ کا مظاہرہ کیا۔ عبدالقادر نے 54 گیندوں پر 80 رنز بنائے، جبکہ عثمان خان نے 111 گیندوں کا سامنا کرتے ہوئے 107 رنز کی اننگز کھیلی۔ دونوں بیٹرز نے نصف سنچریاں مکمل کرنے کے بعد سنچری اور بڑے مجموعے کی بنیاد رکھی۔
بھارت کی جانب سے کاویہ پریش پٹیل نے 4 وکٹیں حاصل کیں، جبکہ چگوروپتی وینکٹے نے 3 پاکستانی کھلاڑیوں کو آؤٹ کیا۔
واضح رہے کہ پاکستان نے ٹورنامنٹ میں فائنل سے قبل کوئی میچ نہیں ہارا تھا اور گروپ مرحلے میں بھی بھارت کو شکست دی تھی، تاہم فیصلہ کن مقابلے میں بھارتی ٹیم نے آخری گیند پر کامیابی حاصل کرلی۔
