پشاور (پاک ٹوڈے): جمعیت علمائے اسلام (جے یو آئی) کی اپیل پر خیبر پختونخوا کے تمام اضلاع میں معدنی ذخائر کے تحفظ، جماعت کے قائدین کے مبینہ میڈیا ٹرائل، کارکنوں کے خلاف کارروائیوں اور تجاوزات کے نام پر آپریشن کے خلاف احتجاجی مظاہرے کیے گئے، جن سے پارٹی کے صوبائی اور ضلعی رہنماؤں نے خطاب کیا۔
مقررین نے کہا کہ صوبے کے معدنی ذخائر پر یہاں کے عوام اور صوبائی حکومت کا حق ملکیت ہے، اس لیے پس پردہ معاہدوں کے بجائے شفاف طریقے سے قوم کو تمام حقائق سے آگاہ کیا جائے۔ ان کا کہنا تھا کہ جمعیت علمائے اسلام کے قائدین کے خلاف میڈیا ٹرائل، کارکنوں کی گرفتاریوں اور دیگر اقدامات سے جماعت اپنے مشن سے پیچھے نہیں ہٹے گی۔
رہنماؤں نے الزام عائد کیا کہ جماعت کے قائدین کے سوالات کا جواب دینے کے بجائے غیر اخلاقی ویڈیوز اور دیگر ذرائع سے کردار کشی کی جا رہی ہے، جبکہ کارکنوں اور عہدے داروں کو نوٹس بھیجنے اور گرفتار کرنے کے ساتھ ان کے خلاف دہشت گردی کے مقدمات بھی درج کیے گئے ہیں۔
مقررین نے کہا کہ جے یو آئی نے 1970 سے 2026 تک گورنر راج کی مخالفت کی ہے اور اسے غیر جمہوری و آمرانہ اقدام قرار دیا ہے۔ ان کے مطابق جماعت نے ملک کے امن اور بقا کے لیے ریاستی اداروں کا ساتھ دیا، تاہم اس دوران جماعت کے قائدین پر خودکش حملے ہوئے اور 250 سے زائد علما اور کارکن جان سے گئے۔
انہوں نے کہا کہ گورنر راج کے نفاذ کا بنیادی مقصد بدامنی اور تشدد کے واقعات کا خاتمہ تھا، لیکن حکومت نے اپنی ترجیحات تبدیل کرتے ہوئے تجاوزات کے خلاف آپریشن شروع کر دیا، جس کے نتیجے میں غریب تاجروں اور شہریوں سے روزگار کے ذرائع چھینے جا رہے ہیں۔ ان کا مؤقف تھا کہ دکانوں، مساجد اور پلازوں کو پیشگی نوٹس دیے بغیر مسمار کرنا قابلِ اعتراض ہے۔
جے یو آئی رہنماؤں نے مزید کہا کہ گورنر اور سرکاری مشیر امن و امان کی صورتِ حال بہتر بنانے کے بجائے سیاسی مخالفین کی کردار کشی میں مصروف ہیں۔ انہوں نے کرک، کوہاٹ اور صوابی میں پولیس افسران کی ہلاکتوں کا حوالہ دیتے ہوئے کہا کہ صوبے میں بدامنی کے واقعات بدستور جاری ہیں۔
پشاور میں مرکزی احتجاجی ریلی مفتی محمود مرکز سے صوبائی جنرل سیکرٹری مولانا عطاءالحق درویش اور دیگر صوبائی و ضلعی رہنماؤں کی قیادت میں نکالی گئی، جو دلہ زاک چوک پہنچ کر اختتام پذیر ہوئی۔
ریلی سے سینیٹر مولانا عطاءالرحمٰن، عبدالجلیل جان، مولانا امان اللہ حقانی، مولانا مسکین شاہ، مولانا احمد علی، زبیر علی، اعجاز خان، عبدالحسیب حقانی، انعام ولی زئی، مولانا حسین مدنی، صدیق پراچہ، مولانا رفیع اللہ قاسمی، مولانا اشرف علی ہارون اور دیگر رہنماؤں نے خطاب کیا۔
مقررین نے کہا کہ جمعیت علمائے اسلام ایک قدیم سیاسی و مذہبی جماعت ہے اور مختلف دباؤ کے باوجود اپنے مؤقف سے پیچھے نہیں ہٹے گی۔ ان کے بقول مصنوعی ذہانت اور جعلی ویڈیوز کے ذریعے پروپیگنڈے کی کوششوں کو عوام نے مسترد کر دیا ہے۔
احتجاج میں جمعیت لائرز فورم، جمعیت اساتذہ فورم، جمعیت طلبہ اسلام، جمعیت بزنس فورم، جمعیت نوجوانان اور انصار الاسلام کے رضاکاروں نے بھی شرکت کی۔
