اسلام آباد (پاک ٹوڈے): عالمی مالیاتی فنڈ (آئی ایم ایف) نے پاکستان سے فیول سبسڈی ختم کرنے اور موجودہ ریلیف اسکیم کو مرحلہ وار ختم کرنے کا مطالبہ کیا ہے۔ ادارے کا مؤقف ہے کہ مستقبل میں فیول سپورٹ محدود، مخصوص مدت کے لیے اور مالی سال 2027 کے بجٹ کے اندر ہونی چاہیے۔
آئی ایم ایف کے ترجمان نے عرب نیوز کو انٹرویو دیتے ہوئے بتایا کہ پاکستان نے ستمبر میں کم آمدنی والے موٹر سائیکل سواروں اور دیگر صارفین کے لیے فیول ریلیف اسکیم شروع کی تھی، جس کے تحت موٹر سائیکل اور رکشہ استعمال کرنے والوں کو ہفتہ وار 500 روپے کا پیٹرول ٹوکن دیا جا رہا ہے، جبکہ 800 سی سی تک کی گاڑیوں کے لیے فی لیٹر 100 روپے رعایت مقرر کی گئی ہے۔
ترجمان کے مطابق آئی ایم ایف نے 7 اکتوبر کو ہونے والے اسٹاف لیول معاہدے میں اس سبسڈی کو ختم کرنے کا مطالبہ کیا تھا۔ ادارے کا مؤقف ہے کہ موجودہ اسکیم میں سبسڈی کی فراہمی کا دائرہ بہت وسیع ہے، اس لیے اسے مرحلہ وار ختم کیا جانا چاہیے۔
آئی ایم ایف کے ترجمان نے کہا کہ پاکستان 7 ارب ڈالر کے قرض پروگرام کے تحت معیشت کی بحالی کے لیے اقدامات کر رہا ہے اور اس نے پیٹرولیم مصنوعات کی قیمتیں عالمی منڈی کی قیمتوں سے ہم آہنگ رکھنے کا وعدہ کیا ہے۔
ترجمان نے مشرقِ وسطیٰ کی جنگ کو پاکستان کی معیشت کے لیے ایک بڑی رکاوٹ قرار دیتے ہوئے کہا کہ پاکستان تیل اور گیس کی درآمد کے لیے خلیجی ممالک پر انحصار کرتا ہے، جبکہ عالمی منڈی میں تیل کی قیمتوں میں اضافے سے ملک میں مہنگائی کا دباؤ بڑھا ہے۔
آئی ایم ایف کے مطابق اکتوبر میں پاکستان میں مہنگائی کی شرح 9.6 فیصد ریکارڈ کی گئی، جو ستمبر میں 10.3 فیصد تھی۔ ترجمان نے خبردار کیا کہ تیل کی قیمتوں میں مسلسل اتار چڑھاؤ ملکی معیشت کے منظرنامے کو متاثر کر سکتا ہے، اس لیے معاشی استحکام برقرار رکھنا ضروری ہے۔
ادارے نے پاکستان میں سرکاری اداروں کی اصلاحات اور توانائی کے شعبے کی بہتری پر بھی زور دیا ہے۔ ترجمان کے مطابق آئی ایم ایف کے ایگزیکٹو بورڈ کا اجلاس دسمبر میں متوقع ہے، جس میں پاکستان سے متعلق معاملات زیرِ غور آ سکتے ہیں۔
