واشنگٹن (پاک ٹوڈے): امریکا میں فضائی نظام میں خرابی کے باعث بڑے پیمانے پر پروازیں متاثر ہونے کے بعد وزیر ٹرانسپورٹ شان ڈفی کے استعفے کا مطالبہ زور پکڑ گیا ہے۔ گزشتہ روز پیش آنے والے بحران کے دوران ملک بھر میں تقریباً 13 ہزار پروازیں متاثر ہوئیں، جبکہ فضائی آپریشن عارضی طور پر روکنا پڑا، جس سے لاکھوں مسافروں کو مشکلات کا سامنا کرنا پڑا۔
گراؤنڈ اسٹاپ ختم ہونے کے باوجود ہزاروں مسافر امریکی ایئرپورٹس پر پھنسے ہوئے ہیں۔ امریکی حکام کے مطابق ایئر ٹریفک کنٹرول سسٹم کو مکمل طور پر بحال کرنے میں مزید وقت لگ سکتا ہے، جس کے باعث پروازوں کا شیڈول بھی متاثر ہو رہا ہے۔
بحران کے بعد امریکی وزیر ٹرانسپورٹ شان ڈفی کو شدید تنقید کا سامنا ہے۔ نیویارک کے گورنر نے مطالبہ کیا ہے کہ شان ڈفی خود عہدے سے مستعفی ہو جائیں، بصورت دیگر صدر ڈونلڈ ٹرمپ انہیں عہدے سے برطرف کریں۔
شان ڈفی نے پروازوں کی غیر معمولی معطلی کی وجہ پرانے ایئر ٹریفک کنٹرول نظام اور فرسودہ ٹیکنالوجی کو قرار دیا تھا۔ ان کے مطابق مسئلہ اس وقت پیدا ہوا جب ایک کنٹریکٹر فائبر آپٹک کیبل میں موجود تانبے کی تاروں کو جدید نظام سے تبدیل کرنے کا کام کر رہا تھا۔
فضائی آپریشن میں اس بڑے تعطل نے امریکی ایئر ٹریفک کنٹرول نظام کی تکنیکی صلاحیت اور اس کی اپ گریڈیشن کے عمل پر بھی سوالات اٹھا دیے ہیں۔ حکام کے مطابق نظام کی مکمل بحالی تک مسافروں کو پروازوں میں تاخیر اور شیڈول میں تبدیلیوں کا سامنا کرنا پڑ سکتا ہے۔
