اسلام آباد (پاک ٹوڈے): پاکستان اور برطانیہ نے معدنی وسائل کی تلاش، ارضیاتی نقشہ سازی، تحقیق اور تکنیکی معلومات کے تبادلے کے لیے طویل مدتی شراکت داری کا مسودہ تیار کرلیا ہے، جس کا مقصد پاکستان کے معدنی شعبے میں شفافیت، ذمہ دارانہ سرمایہ کاری اور تکنیکی صلاحیتوں کو فروغ دینا ہے۔
برطانوی ہائی کمیشن کی جانب سے جاری بیان کے مطابق برطانوی ہائی کمشنر جین میریٹ نے اسلام آباد میں پاکستان منرلز انویسٹمنٹ فورم سے خطاب کرتے ہوئے مجوزہ تعاون کا اعلان کیا۔
مجوزہ مفاہمت کی یادداشت برٹش جیولوجیکل سروے (BGS) اور جیولوجیکل سروے آف پاکستان (GSP) کے درمیان تعاون کا فریم ورک فراہم کرے گی، جس کے تحت دونوں ادارے ارضیاتی تحقیق، معدنی وسائل کی نقشہ سازی، تکنیکی معلومات کے تبادلے اور جدید ڈیٹا کی تیاری پر مل کر کام کریں گے۔ اس شراکت داری میں اہم معدنیات کی تلاش اور ماحولیاتی پائیداری پر بھی توجہ دی جائے گی۔
برطانوی ہائی کمیشن کے مطابق پاکستان میں تانبے، سونے، کوئلے، کرومائٹ، نمک اور صنعتی معدنیات کے وسیع ذخائر موجود ہیں، تاہم ملکی مجموعی قومی پیداوار میں کان کنی کے شعبے کا حصہ دو فیصد سے بھی کم ہے۔
جین میریٹ کا کہنا تھا کہ پاکستان میں معدنی وسائل کی بڑی صلاحیت موجود ہے، تاہم انہیں مقامی آبادی کے لیے روزگار، برآمدات اور سرمایہ کاری کے مواقع میں تبدیل کرنے کے لیے قابل اعتماد ارضیاتی ڈیٹا، مضبوط اداروں اور شفاف سپلائی چین کی ضرورت ہے۔
انہوں نے کہا کہ برطانیہ اپنی تکنیکی مہارت اور پاکستانی اداروں کی صلاحیتوں کو یکجا کرکے سرمایہ کاروں کا اعتماد بڑھانے اور مقامی آبادیوں کے لیے طویل مدتی معاشی مواقع پیدا کرنے میں کردار ادا کرنا چاہتا ہے۔
پاکستانی ماہرین کی 16 ہفتوں کی تربیت
مجوزہ تعاون کے ساتھ پاکستان کے جیولوجیکل سروے کے عملے نے برطانوی حکومت کی مالی معاونت سے 16 ہفتوں پر مشتمل تکنیکی تربیتی پروگرام بھی مکمل کیا ہے۔
یہ تربیت برطانیہ کے ریونیو موبلائزیشن، انویسٹمنٹ اینڈ ٹریڈ (REMIT) پروگرام کے تحت فراہم کی گئی، جس میں پاکستانی ماہرین کو جدید ارضیاتی سروے اور معدنی وسائل کی جانچ کے طریقوں سے آگاہ کیا گیا۔
پروگرام میں ڈیجیٹل ارضیاتی سروے، جیوکیمیکل نمونوں کا حصول، فضائی جیو فزیکل سروے، جغرافیائی معلومات کے نظام (GIS) کے ذریعے نقشہ سازی اور اسپیکٹرل ریموٹ سینسنگ جیسی تکنیکیں شامل تھیں۔
ان مہارتوں سے معدنی ذخائر کی شناخت، سائنسی جانچ اور سرمایہ کاری کے لیے قابل اعتماد معلومات کی تیاری میں مدد ملنے کی توقع ہے۔
پاکستان منرلز انویسٹمنٹ فورم 13 نومبر 2026 کو اسلام آباد کے جناح کنونشن سینٹر میں منعقد ہوا تھا، جس میں معدنی شعبے میں ملکی اور غیر ملکی سرمایہ کاری کے امکانات پر تبادلہ خیال کیا گیا۔
برطانوی حکومت کا REMIT پروگرام پاکستان میں معاشی اصلاحات، محصولات میں اضافے، کاروباری و سرمایہ کاری کے ماحول میں بہتری اور تجارت و برآمدات کے فروغ کے لیے کام کر رہا ہے۔ معدنیات کے شعبے میں بھی اس پروگرام کے تحت ادارہ جاتی صلاحیتوں کو مضبوط بنانے پر توجہ دی جا رہی ہے۔
تاہم برٹش جیولوجیکل سروے اور جیولوجیکل سروے آف پاکستان کے درمیان مفاہمت کی یادداشت ابھی مسودے کی شکل میں ہے اور اس پر عمل درآمد دونوں اداروں کی حتمی منظوری سے مشروط ہوگا۔
