شاہین آفریدی| پشاور، پاک ٹوڈے
زلمی فاؤنڈیشن کے زیرِ اہتمام زلمی ویمن لیگ کے ٹرائلز کا انعقاد کیا گیا، جس میں ملک کے مختلف علاقوں سے تعلق رکھنے والی باصلاحیت نوجوان خواتین کھلاڑیوں نے بھرپور شرکت کی۔ ٹرائلز کا مقصد نوجوان خواتین کو اپنی صلاحیتوں کے اظہار کے لیے ایسا پلیٹ فارم فراہم کرنا تھا، جہاں وہ اپنے ٹیلنٹ، محنت اور عزائم کا مظاہرہ کر سکیں۔
ٹرائلز کے دوران کھلاڑیوں نے بیٹنگ، باؤلنگ، فیلڈنگ اور فٹنس سمیت کھیل کے مختلف شعبوں میں اپنی مہارت کا مظاہرہ کیا اور سلیکٹرز کو متاثر کیا۔ شرکاء کا کہنا تھا کہ اس طرح کے پلیٹ فارم سے انہیں آگے بڑھنے کی حوصلہ افزائی ملتی ہے اور وہ مستقبل میں پاکستان کی نمائندگی کرنے کے لیے مزید محنت کریں گی۔
اس موقع پر زلمی فاؤنڈیشن کے ترجمان غفار نے کہا کہ ہر لڑکی اس بات کی حق دار ہے کہ اسے اپنی صلاحیتوں کو نکھارنے اور اپنے خوابوں کو حقیقت میں بدلنے کا موقع ملے۔ انہوں نے کہا کہ زلمی ویمن لیگ کا مقصد محض ٹیم بنانا نہیں بلکہ خواتین کو بااختیار بنانا اور انہیں کھیلوں میں برابر کے مواقع فراہم کرنا ہے۔
غفار نے مزید کہا کہ زلمی فاؤنڈیشن نوجوان ٹیلنٹ کو سامنے لانے کے لیے اس طرح کے اقدامات جاری رکھے گی تاکہ ملک کے دور دراز علاقوں سے بھی باصلاحیت لڑکیاں آگے آ سکیں اور قومی و بین الاقوامی سطح پر پاکستان کا نام روشن کر سکیں۔
زلمی فاؤنڈیشن اس طرح کے اقدامات کے ذریعے خواتین کو بااختیار بنانے، انہیں کھیلوں میں شامل کرنے اور نوجوان ٹیلنٹ کے لیے آگے بڑھنے کی راہیں ہموار کرنے کے مشن پر مسلسل کام کر رہی ہے۔ زلمی ویمن لیگ نوجوان خواتین کرکٹرز کے لیے ایک ایسا پلیٹ فارم بن رہی ہے، جہاں وہ اپنی صلاحیتوں کو منوا کر قومی اور بین الاقوامی سطح تک رسائی حاصل کر سکتی ہیں۔ یہ اقدامات مستقبل میں پاکستان کی ویمن کرکٹ کو مضبوط بنانے میں اہم کردار ادا کر سکتے ہیں۔
