وانا (پاک ٹوڈے): جنوبی وزیرستان کی تحصیل وانا کے علاقے ڈوگ میں نامعلوم افراد کی گاڑی پر فائرنگ کے نتیجے میں کلعدم تنظیم کے سابق کمانڈر ملا نذیر کے سابق ساتھی محمد خالد مارے گئے، جبکہ ان کا ایک ساتھی شدید زخمی ہو گیا۔
ڈی ایس پی وانا سرکل اصغر علی شاہ اور پولیس ذرائع کے مطابق یہ واقعہ ہفتے کی شام اس وقت پیش آیا جب محمد خالد اور نور غلام رستم بازار سے واپس اپنے گھر ڈوگ جا رہے تھے۔ قبرستان کے قریب پہلے سے گھات لگائے نامعلوم مسلح افراد نے ان کی گاڑی پر اندھا دھند فائرنگ کر دی۔
فائرنگ کے نتیجے میں محمد خالد شدید زخمی ہو گئے، جنہیں فوری طور پر طبی امداد فراہم کی گئی اور ڈیرہ اسماعیل خان منتقل کیا جا رہا تھا تاہم وہ زخموں کی تاب نہ لاتے ہوئے راستے میں ہی دم توڑ گئے۔ دوسرے زخمی شخص، نور غلام کو ڈسٹرکٹ ہیڈ کوارٹر ہسپتال وانا منتقل کر دیا گیا ہے جہاں ان کا علاج جاری ہے۔
پولیس کا کہنا ہے کہ ابتدائی رپورٹ درج کر کے واقعے کی تحقیقات کا آغاز کر دیا گیا ہے اور حملے میں ملوث افراد کی گرفتاری کے لیے کارروائی کی جا رہی ہے۔