خیبر پختونخوا میں سروائیکل کینسر سے بچاؤ کی ویکسین مہم، 29 لاکھ بچیوں کو حفاظتی ٹیکے لگانے کا ہدف

رپورٹ: ریاض حسین

پشاور: خیبر پختونخوا حکومت نے خواتین میں سروائیکل کینسر (بچہ دانی کے منہ کا سرطان) سے بچاؤ کے لیے صوبے بھر میں بڑے پیمانے پر حفاظتی ویکسین مہم شروع کر دی ہے، جس کے دوران 9 سے 14 سال تک کی 29 لاکھ بچیوں کو ہیومن پیپیلوما وائرس (ایچ پی وی) سے بچاؤ کے ٹیکے لگانے کا ہدف مقرر کیا گیا ہے۔

11 نومبر سے شروع ہونے والی یہ مہم 24 نومبر تک جاری رہے گی، جس کے لیے صوبے بھر میں 5 ہزار سے زائد ویکسینیشن ٹیمیں تعینات کی گئی ہیں۔ بچیوں کو ویکسین اسکولوں اور کمیونٹی کی سطح پر فراہم کی جا رہی ہے تاکہ اسکول جانے والی اور اسکولوں سے باہر رہنے والی دونوں اقسام کی بچیوں تک رسائی ممکن بنائی جا سکے۔

مہم کے دوران دور دراز اور دشوار گزار علاقوں میں رہنے والی بچیوں کو بھی خصوصی طور پر ویکسین فراہم کرنے کے انتظامات کیے گئے ہیں۔

خیبر پختونخوا کے توسیعی پروگرام برائے حفاظتی ٹیکہ جات (ای پی آئی) کے ڈپٹی ڈائریکٹر ڈاکٹر مہتاب خان نے بتایا کہ صوبائی حکومت نے اس مہم کے دوران 29 لاکھ بچیوں کو حفاظتی ٹیکے لگانے کا ہدف مقرر کیا ہے۔

مہم کے انتظامات کی وضاحت کرتے ہوئے انہوں نے کہا کہ ویکسینیشن ٹیمیں اسکولوں میں جا کر زیر تعلیم بچیوں کو ویکسین لگا رہی ہیں، جبکہ اسکولوں میں رہ جانے والی بچیوں تک پہنچنے کے لیے کمیونٹی کی سطح پر خصوصی ٹیمیں تشکیل دی گئی ہیں۔

انہوں نے کہا، ’’ہماری ٹیمیں ان بچیوں کو ویکسین لگانے کے لیے ان کے محلوں اور گھروں تک جائیں گی جو اسکولوں میں ویکسین حاصل نہیں کر سکیں گی۔ اس کے علاوہ دور دراز اور دشوار گزار علاقوں تک رسائی کے لیے موبائل ٹیمیں بھی تعینات کی گئی ہیں۔‘‘

ڈاکٹر مہتاب خان کے مطابق صوبے کے مختلف اضلاع میں یہ مہم جاری ہے تاکہ تمام اہل بچیوں کو ایچ پی وی سے تحفظ فراہم کیا جا سکے، جو سروائیکل کینسر کی زیادہ تر وجوہات میں بنیادی کردار ادا کرتا ہے۔

محکمہ صحت اور عالمی اداروں کی مہم کی حمایت

مہم کی افتتاحی تقریب میں عالمی ادارہ صحت (ڈبلیو ایچ او)، یونیسیف، پاکستان پیڈیاٹرک ایسوسی ایشن اور سوسائٹی آف آبسٹیٹریشیزن اینڈ گائناکالوجسٹس آف پاکستان کے نمائندوں نے شرکت کی۔

ان اداروں کے نمائندوں نے ایچ پی وی ویکسین کو محفوظ اور مؤثر قرار دیتے ہوئے سروائیکل کینسر کی روک تھام میں اس کی اہمیت اجاگر کی۔ انہوں نے والدین، اساتذہ اور معاشرے کے دیگر افراد پر زور دیا کہ وہ اہل بچیوں کو ویکسین لگوانے میں تعاون کریں اور اس حوالے سے پائی جانے والی غلط فہمیوں اور بے بنیاد معلومات کے خاتمے میں اپنا کردار ادا کریں۔

ڈائریکٹر جنرل ہیلتھ سروسز خیبر پختونخوا ڈاکٹر نعیم اعوان نے مہم کی کامیابی کے لیے صوبائی حکومت کے عزم کا اعادہ کیا۔

انہوں نے کہا کہ ویکسینیشن کے مقررہ ہدف کے حصول اور صوبے بھر میں بچیوں تک رسائی یقینی بنانے کے لیے مختلف محکموں کے درمیان مؤثر رابطہ کاری، نگرانی اور عوامی سطح پر آگاہی انتہائی اہم ہے۔

ایچ پی وی ویکسین کی شمولیت پاکستان کے توسیعی پروگرام برائے حفاظتی ٹیکہ جات (ای پی آئی) میں 13ویں ویکسین کا اضافہ ہے، جسے ملک میں حفاظتی صحت کی سہولیات کے فروغ کی جانب ایک اہم پیش رفت قرار دیا جا رہا ہے۔

سروائیکل کینسر کے خاتمے کے لیے ڈبلیو ایچ او کی حکمت عملی

عالمی ادارہ صحت (ڈبلیو ایچ او) سروائیکل کینسر کے خاتمے کے لیے ایچ پی وی ویکسینیشن کو اپنی عالمی حکمت عملی کا بنیادی جزو قرار دیتا ہے۔

ڈبلیو ایچ او کے مطابق ہیومن پیپیلوما وائرس (ایچ پی وی) کی بعض خطرناک اقسام سے مسلسل متاثر رہنا سروائیکل کینسر کے تقریباً تمام کیسز کی بنیادی وجہ ہے۔

ادارہ بنیادی طور پر 9 سے 14 سال کی بچیوں کو اس وائرس سے بچاؤ کی ویکسین لگانے کی سفارش کرتا ہے، کیونکہ وائرس سے ممکنہ سامنا ہونے سے پہلے ویکسین لگوانا زیادہ مؤثر تحفظ فراہم کرتا ہے۔ قومی ویکسینیشن شیڈول کے مطابق اس عمر میں ایک یا دو خوراکیں تجویز کی جا سکتی ہیں۔

ڈبلیو ایچ او کے مطابق ایچ پی وی ویکسین محفوظ اور مؤثر ہے۔ اس کے عام ضمنی اثرات میں انجکشن لگنے والی جگہ پر عارضی درد اور معمولی ردعمل شامل ہو سکتے ہیں، جبکہ سنگین مضر اثرات انتہائی کم ہوتے ہیں۔

سروائیکل کینسر کے خاتمے کے لیے ڈبلیو ایچ او نے 2030 تک تین اہم اہداف مقرر کیے ہیں۔ ان کے تحت 15 سال کی عمر تک 90 فیصد بچیوں کو ایچ پی وی ویکسین لگانا، 35 اور 45 سال کی عمر میں 70 فیصد خواتین کی مؤثر طریقے سے اسکریننگ کرنا اور سروائیکل کینسر یا اس سے پہلے کی غیر معمولی تبدیلیوں کی تشخیص ہونے والی 90 فیصد خواتین کو مناسب علاج فراہم کرنا شامل ہے۔

 سروائیکل کینسر کیا ہے اور اس سے کیسے بچا جا سکتا ہے؟

سروائیکل کینسر خواتین میں بچہ دانی کے نچلے حصے، جسے رحم کا منہ یا سروکس کہا جاتا ہے، میں پیدا ہونے والا سرطان ہے۔ یہ حصہ بچہ دانی کو اندام نہانی سے ملاتا ہے۔

یہ بیماری عموماً ہیومن پیپیلوما وائرس (ایچ پی وی) کی بعض خطرناک اقسام سے مسلسل متاثر رہنے کے نتیجے میں پیدا ہوتی ہے۔

ایچ پی وی ایک عام وائرس ہے جو خواتین اور مردوں دونوں کو متاثر کر سکتا ہے۔ زیادہ تر افراد میں جسم کا مدافعتی نظام اس وائرس کو خود ختم کر دیتا ہے، تاہم بعض صورتوں میں وائرس کا مسلسل موجود رہنا بچہ دانی کے منہ کے خلیوں میں غیر معمولی تبدیلیوں کا باعث بن سکتا ہے، جو وقت گزرنے کے ساتھ سرطان میں تبدیل ہو سکتی ہیں۔

یہ بیماری عموماً کئی سال میں بتدریج نشوونما پاتی ہے اور ابتدائی مرحلے میں اکثر واضح علامات ظاہر نہیں ہوتیں۔ تاہم بیماری بڑھنے کی صورت میں غیر معمولی خون آنا، ازدواجی تعلق کے بعد خون آنا، غیر معمولی اخراج اور پیڑو یا نچلے پیٹ میں مسلسل درد جیسی علامات سامنے آ سکتی ہیں۔

طبی ماہرین کے مطابق سروائیکل کینسر سے بڑی حد تک بچاؤ ممکن ہے۔ اس کے لیے ایچ پی وی ویکسینیشن، خواتین کی باقاعدہ اسکریننگ اور بیماری سے پہلے پیدا ہونے والی غیر معمولی تبدیلیوں کی بروقت تشخیص اور علاج ضروری ہے۔

نوجوانی میں ویکسین لگوانا اس لیے اہم ہے کہ یہ وائرس سے ممکنہ سامنا ہونے سے پہلے تحفظ فراہم کرتی ہے۔ تاہم ویکسین لگوانے کے بعد بھی خواتین کے لیے عمر اور طبی رہنما اصولوں کے مطابق سروائیکل کینسر کی اسکریننگ ضروری رہتی ہے۔

ڈبلیو ایچ او کے مطابق سروائیکل کینسر دنیا بھر میں خواتین کی صحت کے لیے ایک بڑا مسئلہ ہے۔ 2024 کے اندازوں کے مطابق دنیا بھر میں اس بیماری کے تقریباً 6 لاکھ 4 ہزار نئے کیسز سامنے آئے جبکہ تقریباً 2 لاکھ 80 ہزار خواتین اس کے باعث جان سے ہاتھ دھو بیٹھیں۔

اس بیماری کا بوجھ کم اور درمیانی آمدنی والے ممالک میں زیادہ ہے، جہاں ویکسینیشن، بیماری کی بروقت تشخیص اور علاج کی سہولیات تک رسائی محدود ہے۔

مہم کی کامیابی کے لیے والدین کا تعاون ضروری

محکمہ صحت کے حکام کے مطابق 29 لاکھ بچیوں کو ویکسین لگانے کا ہدف حاصل کرنے کے لیے والدین، اساتذہ، مقامی عمائدین اور صحت کے کارکنوں کا تعاون انتہائی اہمیت رکھتا ہے۔

حکام کا کہنا ہے کہ عوامی سطح پر آگاہی پیدا کرنا ضروری ہے تاکہ ایچ پی وی ویکسین کے بارے میں پائی جانے والی غلط فہمیوں کا خاتمہ کیا جا سکے اور والدین کو اس کی افادیت اور سروائیکل کینسر سے بچاؤ میں اس کے کردار سے آگاہ کیا جا سکے۔

صحت کے حکام کے مطابق یہ مہم خیبر پختونخوا میں حفاظتی صحت کی سہولیات کو مزید مضبوط بنانے اور خواتین میں سروائیکل کینسر کے بارے میں آگاہی بڑھانے کا اہم موقع ہے، کیونکہ اکثر خواتین میں اس بیماری کی تشخیص اس وقت ہوتی ہے جب وہ خطرناک مرحلے میں داخل ہو چکی ہوتی ہیں۔

محکمہ صحت نے والدین پر زور دیا ہے کہ وہ ویکسینیشن ٹیموں کے ساتھ تعاون کریں اور اس بات کو یقینی بنائیں کہ 9 سے 14 سال کی تمام اہل بچیاں مقررہ مہم کے دوران ایچ پی وی ویکسین حاصل کریں۔