حمید سمسور | کوئٹہ، پاک ٹوڈے
وفاقی حکومت نے بلوچستان کے کوٹے کی 5,387 خالی آسامیوں پر بھرتیاں کرنے کا فیصلہ کیا ہے، تاہم بھرتیوں کے طریقہ کار اور مختلف علاقوں کی نمائندگی پر پشتون سیاسی جماعتوں نے تحفظات کا اظہار کیا ہے۔ پشتونخوا نیشنل عوامی پارٹی نے الزام عائد کیا ہے کہ بھرتیوں میں پشتون علاقوں کو نظر انداز کیا جا رہا ہے، جبکہ پشتونخوا ملی عوامی پارٹی نے بھی کوٹہ سسٹم کی خلاف ورزی پر تشویش ظاہر کی ہے۔
وفاقی محکموں میں بھرتیوں کے حوالے سے منعقدہ اجلاس میں مختلف وزارتوں اور ڈویژنوں کے متعلقہ افسران نے شرکت کی۔ اجلاس میں بھرتیوں کے لیے جامع منصوبے پر غور کیا گیا اور امیدواروں کو مساوی مواقع فراہم کرنے کے عزم کا اظہار کیا گیا۔
اجلاس میں بتایا گیا کہ مخصوص آسامیوں کے لیے ٹیسٹ 20 نومبر سے 8 دسمبر تک منعقد کیے جائیں گے۔ امیدواروں کو ہدایت کی گئی ہے کہ وہ اپنی تعلیمی اسناد، قومی شناختی کارڈ، ڈومیسائل اور دیگر ضروری دستاویزات مکمل رکھیں۔
دوسری جانب وزیراعلیٰ بلوچستان میر سرفراز بگٹی نے وفاق کی جانب سے ملازمتوں کی فراہمی پر وزیراعظم پاکستان اور فیلڈ مارشل عاصم منیر کا شکریہ ادا کرتے ہوئے کہا ہے کہ بلوچستان کو مجموعی طور پر 25 ہزار ملازمتیں فراہم کی جائیں گی اور یہ بھرتیاں مرحلہ وار ہوں گی۔
ان کا کہنا تھا کہ جن علاقوں کے لوگ تیل کے کاروبار کو اپنا مستقبل سمجھ رہے تھے، انہیں زیادہ ملازمتیں فراہم کی جائیں گی۔
سات امتحانی مراکز قائم
حکومت بلوچستان نے دور دراز علاقوں کے امیدواروں کی سہولت کے لیے وفاقی محکموں میں بھرتیوں کے دوسرے مرحلے کے امتحانات کے لیے صوبے میں سات مراکز مقرر کیے ہیں۔
ان میں ژوب، رکھنی، لورالائی، سبی، پشین اور کوئٹہ کے دو مراکز شامل ہیں۔ ژوب مرکز میں ژوب، شیرانی اور قلعہ سیف اللہ؛ رکھنی میں بارکھان، کوہلو اور ڈیرہ بگٹی کے بالائی علاقوں؛ لورالائی میں موسیٰ خیل، دکی، ہرنائی اور زیارت؛ جبکہ سبی مرکز میں نصیر آباد، جعفر آباد، اوستہ محمد اور ڈیرہ بگٹی کے امیدوار امتحان دیں گے۔
اسی طرح پشین مرکز قلعہ عبداللہ، چمن اور برشور کے امیدواروں کے لیے مختص کیا گیا ہے۔ کوئٹہ میں BUITEMS مرکز کے تحت کوئٹہ ایسٹ اور ویسٹ جبکہ میاں غنڈی مرکز میں مستونگ، قلات، سوراب اور نوشکی کے امیدوار امتحان دیں گے۔
حکام کے مطابق دوسرے مرحلے کے امتحانات کی حتمی تاریخ، مقامات اور اوقات کا اعلان بعد میں کیا جائے گا، جبکہ کیسکو کی بھرتیوں کے امتحانات متعلقہ اضلاع کے ضلعی ہیڈکوارٹرز میں منعقد ہوں گے۔
پشتون علاقوں کو نظر انداز کرنے کا الزام
پشتونخوا نیشنل عوامی پارٹی کے بلوچستان کے صوبائی صدر نصراللہ زیرے نے پاک ٹوڈے سے گفتگو کرتے ہوئے کہا کہ وفاقی حکومت کی جانب سے کسٹمز، ریلوے، ایف آئی اے، کیسکو، این ایچ اے اور دیگر محکموں میں اعلان کردہ تقریباً 5 ہزار ملازمتوں میں پشتون علاقوں کو نظر انداز کیا گیا ہے۔
ان کے مطابق ریلوے کوئٹہ ڈویژن میں اسکیل ایک سے 15 تک تقریباً 900 خالی آسامیوں کا اعلان کیا گیا تھا، جن کے لیے صوبے کے ہزاروں بے روزگار پشتون نوجوانوں نے اپنی تعلیمی قابلیت کے مطابق درخواستیں جمع کرائی تھیں۔
نصراللہ زیرے کا دعویٰ ہے کہ اب ان آسامیوں کے انٹرویوز کے لیے گوادر، پنجگور، واشک، آواران، خاران، خضدار، بیلہ، حب، تربت اور چاغی کے نوجوانوں کو منتخب کرنے کا فیصلہ کیا جا رہا ہے، حالانکہ ان علاقوں میں ریلوے کی پٹڑی اور اسٹیشن تک موجود نہیں ہیں۔
انہوں نے کہا کہ کوئٹہ سے چمن اور سبی سے شاہرگ تک ریلوے کے وسیع نیٹ ورک پر تقریباً 250 گینگ مین (قلی) کی آسامیاں طویل عرصے سے خالی پڑی ہیں۔
ان کا کہنا تھا کہ وفاقی حکومت اور اس کے ماتحت اداروں میں پشتون علاقوں کو روزگار، تعلیم، صحت، ترقیاتی منصوبوں، سرکاری ملازمتوں اور وفاقی اداروں میں نمائندگی سمیت مختلف شعبوں میں ان کے جائز حصے سے محروم رکھا جا رہا ہے۔
پشتونخوا نیشنل عوامی پارٹی نے اس معاملے پر بلوچستان ہائی کورٹ سے رجوع کرنے اور رٹ پٹیشن دائر کرنے کا اعلان بھی کیا ہے۔ پارٹی کے مطابق اس اقدام کا مقصد پشتون نوجوانوں کے آئینی اور قانونی حقوق کا تحفظ اور بھرتیوں میں میرٹ و انصاف کو یقینی بنانا ہے۔
ادھر پشتونخوا ملی عوامی پارٹی نے بھی وفاقی اور صوبائی ملازمتوں میں کوٹہ سسٹم کی مبینہ خلاف ورزی پر شدید تحفظات کا اظہار کرتے ہوئے اسے میرٹ کی پامالی اور بے روزگار نوجوانوں کے ساتھ ناانصافی قرار دیا ہے۔
