اسلام آباد (پاک ٹوڈے): کراچی کے شہری ملک بھر میں سب سے مہنگا آٹا خریدنے پر مجبور ہیں، جہاں 20 کلو آٹے کے تھیلے کی قیمت 3 ہزار 540 روپے تک برقرار ہے۔
وفاقی ادارہ شماریات کی تازہ رپورٹ میں ملک کے مختلف شہروں میں آٹے کی قیمتوں کی تفصیلات جاری کی گئی ہیں، جس کے مطابق کراچی میں 20 کلو آٹے کا تھیلا سب سے زیادہ قیمت پر فروخت ہورہا ہے۔
رپورٹ کے مطابق حیدرآباد میں 20 کلو آٹے کے تھیلے کی قیمت 3 ہزار 400 روپے ریکارڈ کی گئی، جبکہ اسلام آباد میں یہی تھیلا 3 ہزار 333 روپے 33 پیسے میں فروخت ہورہا ہے۔
اسی طرح راولپنڈی میں 20 کلو آٹے کے تھیلے کی قیمت 3 ہزار 306 روپے 66 پیسے ہے، جبکہ لاڑکانہ اور پشاور میں 3 ہزار 300 روپے میں فروخت جاری ہے۔
ملک کے مختلف شہروں میں آٹے کی قیمتوں میں فرق کے باعث شہریوں کو بنیادی غذائی ضرورت کی خریداری کے لیے مختلف نرخوں کا سامنا ہے۔
