تہران (پاک ٹوڈے): ایران نے امریکا اور اسرائیل کے حملوں میں مبینہ طور پر تعاون کرنے والے خطے کے بعض ممالک سے جنگی نقصانات کا ہرجانہ ادا کرنے کا مطالبہ کر دیا ہے۔
ایرانی وزارتِ خارجہ کے ترجمان اسماعیل بقائی نے کہا ہے کہ بعض علاقائی ممالک نے ایران کے خلاف امریکا اور اسرائیل کے اقدامات میں براہِ راست یا بالواسطہ کردار ادا کیا۔ ان کے مطابق اقوام متحدہ کے منشور کے تحت ان ممالک پر لازم ہے کہ وہ ایران کو پہنچنے والے نقصانات کا معاوضہ ادا کریں۔
اسماعیل بقائی کا کہنا تھا کہ ان الزامات سے متعلق شواہد اور دستاویزات جمع کر لی گئی ہیں اور سفارتی ذرائع کے ذریعے متعلقہ ممالک کے ساتھ شیئر بھی کی گئی ہیں۔ ایران اس معاملے کو ہر ممکن طریقے سے آگے بڑھائے گا۔
ایرانی ترجمان نے کسی مخصوص ملک کا نام نہیں لیا، تاہم ایران کا مؤقف ہے کہ خطے میں موجود امریکی فوجی اڈوں اور سہولیات کو اس کے خلاف حملوں کے لیے استعمال کیا گیا۔ تہران اس سے قبل بھی خطے کے بعض ممالک پر امریکی اور اسرائیلی فوجی کارروائیوں میں سہولت کاری کے الزامات عائد کر چکا ہے۔
دوسری جانب خلیجی ممالک اس تنازع کے دوران ایران کے میزائل اور ڈرون حملوں پر تشویش کا اظہار کرتے رہے ہیں اور اپنی خودمختاری کی خلاف ورزی قرار دیتے ہوئے ان حملوں کی مذمت کر چکے ہیں۔
