بیروت( پاک ٹوڈے): لبنانی فوج نے دارالحکومت بیروت کے جنوبی مضافاتی علاقے میں کارروائی کرتے ہوئے بھاری مقدار میں اسلحہ اور بارود قبضے میں لینے کا دعویٰ کیا ہے، جبکہ کارروائی کے دوران ایک شخص کو بھی گرفتار کیا گیا۔
لبنانی فوج کے مطابق یہ کارروائی جمعے کے روز مشرفیہ کے علاقے میں ایک اسلحہ ڈپو پر چھاپے کے دوران کی گئی۔ فوج نے بتایا کہ علاقے میں نقل و حرکت اور سامان کی ترسیل کی مسلسل نگرانی کے بعد کارروائی کا فیصلہ کیا گیا۔
فوجی بیان میں اسلحہ اور بارود کی ضبطگی کی تصدیق کی گئی، تاہم یہ واضح نہیں کیا گیا کہ جس ڈپو پر چھاپا مارا گیا وہ کس تنظیم یا گروہ کی ملکیت تھا۔
بیروت کا جنوبی مضافاتی علاقہ حزب اللہ کا مضبوط گڑھ سمجھا جاتا ہے۔ لبنانی فوج ایک عرصے سے ملک میں مسلح گروہوں کو غیر مسلح کرنے کی کوششوں میں مصروف ہے، جس میں حزب اللہ کے ہتھیاروں کا معاملہ بھی اہمیت رکھتا ہے۔
اس سے قبل 10 اکتوبر کو دو مشتبہ افراد کو گرفتار کیا گیا تھا، جن پر الزام تھا کہ وہ تقریباً نصف ٹن بارود منتقل کر رہے تھے۔ اس واقعے کی تفصیلات لبنانی عدالتی ذرائع نے فراہم کی تھیں۔
واضح رہے کہ بیروت کے جنوبی مضافاتی علاقے کو دو سال قبل اسرائیلی بمباری کے دوران شدید نقصان پہنچا تھا۔ لبنانی فوج کی حالیہ کارروائی ایسے وقت میں سامنے آئی ہے جب ملک میں اسلحے پر ریاستی کنٹرول اور مسلح گروہوں کو غیر مسلح کرنے کا معاملہ اہم سیاسی اور سکیورٹی موضوع بنا ہوا ہے۔
