جنوبی وزیرستان (پاک ٹوڈے): جنوبی وزیرستان لوئر اور اپر کے مختلف علاقوں میں آج 14 نومبر کو صبح 6 بجے سے شام 7 بجے تک کرفیو نافذ رہے گا، جس کے دوران متعدد اہم شاہراہوں پر آمدورفت بند جبکہ بازار اور مارکیٹس بھی بند رہیں گی۔
اعلامیے کے مطابق جنوبی وزیرستان لوئر کی تحصیل وانا کے مختلف علاقوں جبکہ جنوبی وزیرستان اپر کی تحصیل سرویکئی اور سراروغہ میں ہر قسم کی غیرضروری نقل و حرکت پر پابندی عائد ہوگی۔
جنوبی وزیرستان لوئر میں وانا، تیارزہ گیٹ، کڑیکوٹ، تنائی، عزیزآباد چوک سے درگئی پل، گل کچھ اور توئی خلہ سے تنائی تک کے راستے بند رہیں گے۔
اسی طرح جنوبی وزیرستان اپر میں لدھا، مکین، تبئی سر، بی بی رغزئی، سراروغہ، کوٹکئی، سپنکئی رغزئی سے نذرخیل سمیت متعدد اہم راستوں پر آمدورفت معطل رہے گی۔ درگئی پل، مدی جان، شین ورسک، مولا خان سرائے، چگملائی سے جنڈولہ، سرویکئی سے بروند اور آسمان منزہ، شیرونگی سے توروام کے راستے بھی بند رہیں گے۔
اعلامیے میں کہا گیا ہے کہ صرف ہنگامی صورتحال میں پولیس یا سیکیورٹی فورسز کی اجازت سے سفر کیا جا سکے گا، تاہم مسافروں کو اپنا شناختی کارڈ اور ضروری دستاویزات فراہم کرنا ہوں گی۔
سیکیورٹی ہدایات کے مطابق سیکیورٹی فورسز کی موجودگی میں گاڑی 50 میٹر پہلے روکنا اور اس میں سوار تمام افراد کو نیچے اترنا ہوگا۔ حکام نے خبردار کیا ہے کہ کرفیو کی خلاف ورزی کی صورت میں اس کی ذمہ داری متعلقہ فرد پر عائد ہوگی۔
