پشاور (پاک ٹوڈے): یمن کے شہر تعز کے مقامی حکام نے حوثی فورسز پر ممنوعہ کیمیائی مواد والے گولے اور راکٹس استعمال کرنے کا الزام عائد کرتے ہوئے اقوام متحدہ سے فوری اور آزادانہ تحقیقات کا مطالبہ کیا ہے۔
تعز گورنریٹ کے میڈیا آفس کے مطابق مختلف محاذوں، بالخصوص الاقرود اور کہلان کے علاقوں سے ایسی اطلاعات موصول ہوئی ہیں کہ حوثی فورسز نے ممکنہ طور پر ممنوعہ گیسوں اور زہریلے مادوں پر مشتمل ہتھیار استعمال کیے ہیں۔
حکام کا کہنا ہے کہ گولہ باری کے بعد عام شہریوں اور مزاحمتی فورسز کے اہلکاروں کو سانس لینے میں شدید دشواری کا سامنا کرنا پڑا اور بعض افراد نیم بے ہوشی کی حالت میں چلے گئے۔ تاہم اب تک ان ہتھیاروں میں استعمال ہونے والے مادوں کی نوعیت کی تصدیق نہیں ہو سکی۔
مقامی حکام نے مطالبہ کیا ہے کہ ماہرین پر مشتمل ٹیم متاثرہ علاقوں کا معائنہ کرے، شواہد اکٹھے کرے اور طبی ریکارڈ سمیت عینی شاہدین کے بیانات کا جائزہ لے تاکہ مبینہ زہریلے مادوں کے استعمال کی حقیقت سامنے آسکے۔
یمن کے نائب وزیر خارجہ مصطفیٰ نعمان نے ایران کی حمایت یافتہ حوثی ملیشیا پر الزام عائد کیا ہے کہ وہ تعز شہر کی جانب پیش قدمی تیز کرنے کے لیے غیر قانونی ہتھیار استعمال کر رہی ہے۔ انہوں نے شہر کا محاصرہ ختم کرنے اور ایک آزاد بین الاقوامی تحقیقاتی ٹیم تعینات کرنے کا مطالبہ بھی کیا۔
یمن کے وزیر اطلاعات معمر الاریانی نے بھی ان الزامات کو خطرناک پیش رفت قرار دیتے ہوئے تحقیقات پر زور دیا ہے۔
دوسری جانب تعز میں یمنی حکومت اور حوثی ملیشیا کے درمیان لڑائی شدت اختیار کر گئی ہے، جبکہ حوثیوں کی جانب سے شہر کا محاصرہ مزید سخت کرنے اور رسد کے اہم راستے بند کرنے کی اطلاعات ہیں۔
اقوام متحدہ نے گزشتہ ہفتے خبردار کیا تھا کہ اہم شاہراہوں کی بندش کے باعث شہر کے تقریباً 8 لاکھ افراد خوراک کی فراہمی سے متاثر ہوئے ہیں۔ ہسپتالوں کو بھی مشکلات کا سامنا ہے جبکہ شہریوں کو پانی کی قلت کا سامنا ہے۔
لڑائی کی تازہ لہر کے باعث ہزاروں افراد نقل مکانی پر مجبور ہو چکے ہیں۔ تعز کے حکام نے شہری علاقوں پر حملے روکنے اور شہریوں کے تحفظ کے لیے فوری اقدامات کا مطالبہ کیا ہے۔