اسلام آباد (پاک ٹوڈے): پاکستان تحریک انصاف (پی ٹی آئی) کے وفد نے جمعیت علمائے اسلام (ف) کے سربراہ مولانا فضل الرحمٰن سے ملاقات کے دوران قومی اسمبلی میں ان کی تقریر کی بھرپور تائید کرتے ہوئے حکومتی وزرا کی جانب سے ان پر ذاتی حملوں اور کردار کشی کی مذمت کی ہے۔
ملاقات میں چیئرمین پی ٹی آئی بیرسٹر گوہر خان اور سابق اسپیکر قومی اسمبلی اسد قیصر شریک تھے۔ پی ٹی آئی رہنماؤں نے کہا کہ سیاسی اختلافات کو ذاتی حملوں اور کردار کشی میں تبدیل کرنا جمہوری اقدار کے منافی ہے، اس لیے سیاسی قیادت کے احترام کو ملحوظِ خاطر رکھا جانا چاہیے۔
ملاقات کے شرکا نے سابق وزیراعظم عمران خان کی بہنوں کی قید، انہیں بنیادی حقوق سے محروم رکھنے اور اہل خانہ و وکلا کو ان تک رسائی نہ دینے پر بھی تشویش کا اظہار کیا۔
انہوں نے خبردار کیا کہ اگر اس طرزِ عمل کے نتیجے میں کوئی ناخوشگوار صورتِ حال پیدا ہوئی تو اس کی ذمہ داری متعلقہ حکام پر عائد ہوگی۔
ملاقات کے دوران وزیراعلیٰ سہیل آفریدی، اسپیکر بابر سلیم سواتی اور پی ٹی آئی کے صوبائی صدر جنید اکبر خان کو فوری طور پر منظرِ عام پر لانے کا مطالبہ بھی کیا گیا۔