النہود (پاک ٹوڈے): افریقی ملک سوڈان کے خطے مغربی کردفان کے قصبے النہود میں واقع سونے کی ایک کان اچانک منہدم ہونے سے کم از کم 60 افراد جاں بحق ہو گئے۔ حادثے کے بعد بڑے پیمانے پر امدادی کارروائیاں جاری ہیں، تاہم متعدد افراد کے اب بھی ملبے تلے دبے ہونے کا خدشہ ہے۔
خبر رساں ادارے ‘رائٹرز’ کے مطابق یہ دلخراش واقعہ 14 ستمبر کو پیش آیا۔ حادثے کے فوراً بعد مقامی افراد اور ریسکیو ٹیموں نے امدادی کام شروع کیا، جس کے دوران اب تک 60 لاشیں نکال لی گئی ہیں۔
حادثے میں معجزانہ طور پر بچ جانے والے دو افراد نے میڈیا کو بتایا کہ اب بھی کئی کان کن لاپتہ ہیں، جن کے ملبے تلے دب کر جاں بحق ہونے کے شدید خدشات موجود ہیں۔ ابتدائی رپورٹوں میں بتایا گیا ہے کہ کان میں حفاظتی تدابیر اور بنیادی سہولیات کی شدید کمی تھی، جو اتنی بڑی تعداد میں ہلاکتوں کا اہم سبب بنی۔
واضح رہے کہ سوڈان کا شمار براعظم افریقا کے ان چند بڑے ممالک میں ہوتا ہے جہاں سے وسیع پیمانے پر سونا حاصل کیا جاتا ہے۔ تاہم، ملک میں قائم بیشتر کانوں میں غیر معیاری اور انتہائی خطرناک طریقوں سے کان کنی کی جاتی ہے، جبکہ تیار سونا بڑی مقدار میں غیر قانونی طور پر بیرون ملک اسمگل کر دیا جاتا ہے۔
مقام حادثہ پر امدادی کارروائیاں تاحال جاری ہیں اور حکام نے خدشہ ظاہر کیا ہے کہ حتمی ہلاکتوں کی تعداد میں مزید اضافہ ہو سکتا ہے۔