تل ابیب (پاک ٹوڈے): اسرائیل میں انتخابات کے بعد سیاسی صورتحال کے تناظر میں تل ابیب میں احتجاجی مظاہرہ کیا گیا، جس میں عوام نے اپوزیشن رہنما گادی آئزن کوٹ سے عرب جماعتوں کو شامل کرکے مخلوط حکومت قائم کرنے کا مطالبہ کیا۔
اسرائیلی میڈیا کے مطابق مظاہرین نے گادی آئزن کوٹ پر زور دیا کہ وہ عرب سیاسی جماعتوں کے ساتھ تعاون کریں تاکہ نئی حکومت تشکیل دی جاسکے۔
دوسری جانب اسرائیلی وزیراعظم بنیامین نیتن یاہو نے بغیر ثبوت پیش کیے عرب جماعتوں کی ریکارڈ 19 نشستوں پر کامیابی کو انتخابی دھاندلی قرار دیا ہے، تاہم عرب رہنماؤں نے ان الزامات کو مسترد کردیا ہے۔
انتخابات کے ابتدائی نتائج کے مطابق کوئی بھی سیاسی اتحاد حکومت سازی کے لیے درکار 61 نشستوں کی واضح اکثریت حاصل نہیں کرسکا۔ نیتن یاہو کے اتحاد کو 53 جبکہ اپوزیشن اتحاد کو 48 نشستیں ملی ہیں۔
انتخابات کے سرکاری نتائج کا اعلان 4 نومبر کو کیا جائے گا، جس کے بعد حکومت سازی کے لیے سیاسی جماعتوں کے درمیان رابطوں اور ممکنہ اتحاد کی صورتحال مزید واضح ہوگی۔