ماؤنٹ ماؤنگانائی (پاک ٹوڈے): بھارت نے پانچویں ون ڈے انٹرنیشنل میں نیوزی لینڈ کو 22 رنز سے شکست دے کر پانچ میچوں کی سیریز 1-3 سے اپنے نام کر لی۔ بھارتی ٹیم نے پہلے بیٹنگ کرتے ہوئے 209 رنز بنائے، جواب میں نیوزی لینڈ کی پوری ٹیم 48 اوورز میں 187 رنز بنا کر آؤٹ ہوگئی۔
نیوزی لینڈ کے ماؤنٹ ماؤنگانائی اسٹیڈیم میں کھیلے گئے میچ میں میزبان ٹیم نے ٹاس جیت کر پہلے فیلڈنگ کا فیصلہ کیا۔ بھارت کی جانب سے روہت شرما اور روتراج گیکواد نے اننگز کا آغاز کیا، تاہم روہت شرما 23 کے مجموعی اسکور پر آؤٹ ہوگئے، جبکہ وراٹ کوہلی بھی صرف 5 رنز بنا سکے۔
بھارتی کپتان شریاس ائیر 22 رنز بنا کر پویلین لوٹے، جبکہ اکشر پٹیل اور ایشان کشن نے 46، 46 رنز کی اننگز کھیل کر ٹیم کو سہارا دیا۔ نمن دھیر نے 22، روتراج گیکواد نے 18 اور ارشدیپ سنگھ نے 14 رنز بنائے۔ محمد سراج 14 رنز کے ساتھ ناٹ آؤٹ رہے۔
نیوزی لینڈ کی جانب سے جیکب ڈفی اور مچل سینٹنر نے تین، تین وکٹیں حاصل کیں، جبکہ میتھیو فشر نے دو کھلاڑیوں کو آؤٹ کیا۔
210 رنز کے ہدف کے تعاقب میں نیوزی لینڈ نے محتاط آغاز کیا، تاہم ابتدائی وکٹیں گرنے کے بعد بھارتی بولرز نے میچ پر گرفت مضبوط کر لی۔ نک کیلی نے 24 اور ڈین فوکس کرافٹ نے 31 رنز بنائے، جبکہ مچل براسویل 19 اور کپتان مچل سینٹنر 24 رنز بنا سکے۔ کیویز کی پوری ٹیم 48 اوورز میں 187 رنز پر آؤٹ ہوگئی۔
بھارت کی جانب سے ارشدیپ سنگھ نے 30 رنز دے کر تین وکٹیں حاصل کیں، جبکہ محمد سراج اور اکشر پٹیل نے دو، دو کھلاڑیوں کو آؤٹ کیا۔ یش ٹھاکر، نمن دھیر اور عاقب نبی نے ایک، ایک وکٹ حاصل کی۔
بہترین بولنگ پر ارشدیپ سنگھ کو میچ کا بہترین کھلاڑی قرار دیا گیا، جبکہ سیریز میں 9 وکٹیں حاصل کرنے والے گرنور برار نے سیریز کے بہترین کھلاڑی کا اعزاز حاصل کیا۔
واضح رہے کہ بھارت نے اس دورے پر پانچ میچوں کی ٹی ٹوئنٹی سیریز بھی 1-4 سے جیتی تھی۔ دونوں ٹیموں کے درمیان دو ٹیسٹ میچوں کی سیریز 19 نومبر سے ویلنگٹن میں شروع ہوگی۔
