ماسکو (پاک ٹوڈے): روس کے پارلیمانی انتخابات کے آخری روز یوکرین کی جانب سے روسی دارالحکومت ماسکو اور اس کے گردونواح پر سیکڑوں ڈرونز سے حملہ کیا گیا، جس کے نتیجے میں کم از کم چار افراد ہلاک اور تیل کی ایک اہم ریفائنری کو شدید نقصان پہنچا ہے۔
روسی حکام کے مطابق اتوار کے روز کیے جانے والے اس حملے کے دوران فضائی دفاعی نظام نے 1,600 سے زائد ڈرونز کو فضا میں ہی تباہ کر دیا۔ ماسکو کے میئر سرگئی سوبیانین نے بیان دیتے ہوئے کہا کہ ان میں سے تقریباً 450 ڈرونز کا براہ راست ہدف ماسکو شہر تھا، تاہم روس نے دشمن کے اس سب سے بڑے حملے کو ناکام بنا دیا ہے۔
دوسری جانب ماسکو ریجن کے گورنر آندرے ووروبیوف نے تصدیق کی ہے کہ دو مختلف مقامات پر ڈرون گرنے اور آگ لگنے سے 44 سالہ خاتون اور ایک بزرگ شہری سمیت دو افراد جان بحق ہوئے۔ علاوہ ازیں، ایک 21 منزلہ رہائشی عمارت سے ڈرون ٹکرانے کے بعد لگی آگ کے باعث 400 افراد کو محفوظ مقامات پر منتقل کرنا پڑا۔
ادھر روس کے زیر قبضہ جنوبی علاقے کھیرسون میں بھی ایک بس پر یوکرینی ڈرون حملے کی اطلاعات ہیں، جس میں الیکشن کمیشن کے ایک رکن سمیت مزید دو افراد کے مارے جانے کی تصدیق کی گئی ہے۔
یوکرینی صدر ولادیمیر زیلنسکی نے ان ڈرون حملوں کی کامیابی کو سراہتے ہوئے کہا ہے کہ کیف کی طویل فاصلے تک مار کرنے والی صلاحیتوں نے ماسکو کے خطے پر انتہائی نمایاں اثرات مرتب کیے ہیں۔ سماجی رابطے کی سائٹ ‘ایکس’ پر اپنے پیغام میں انہوں نے دعویٰ کیا کہ حملوں کا بنیادی مقصد روس کی تیل کی صنعت کی کلیدی تنصیبات اور لاجسٹکس کے نظام کو نشانہ بنانا تھا۔
روس کی وزارتِ دفاع اور ہنگامی خدمات کے ادارے فی الوقت متاثرہ علاقوں اور ریفائنری میں سیکیورٹی اور بحالی کے اقدامات میں مصروف ہیں۔
