واشنگٹن (پاک ٹوڈے): امریکی وفاقی عدالت نے صدر ڈونلڈ ٹرمپ کی انتظامیہ کو امریکہ میں مقیم افغان شہریوں کی افغانستان یا پاکستان ملک بدری سے روک دیا ہے۔
نیویارک کی جنوبی ضلعی عدالت کی جج ویلیری کیپرونی نے منگل کو حکم دیا کہ امریکی حکومت رواں ہفتے کسی بھی افغان شہری کو افغانستان یا پاکستان نہیں بھیج سکتی۔ انسانی حقوق کی تنظیموں نے خبردار کیا تھا کہ ملک بدری کی صورت میں افغان شہریوں کی زندگیاں خطرے میں پڑ سکتی ہیں۔
عدالتی دستاویزات کے مطابق امریکی امیگریشن اینڈ کسٹمز انفورسمنٹ (آئی سی ای) کے ڈپٹی اسسٹنٹ ڈائریکٹر کرسٹوفر جارج نے عدالت کو بتایا کہ رواں ہفتے افغان شہریوں کو افغانستان یا پاکستان منتقل کرنے کے لیے کسی خصوصی یا کمرشل پرواز کا منصوبہ نہیں بنایا گیا اور نہ ہی ایسی کسی پرواز کی تصدیق ہوئی ہے۔
اس سے قبل امریکی میڈیا نے رپورٹ کیا تھا کہ ٹرمپ انتظامیہ کے امیگریشن کے خلاف سخت اقدامات کے تحت امریکہ میں مقیم 150 سے زائد افغان شہریوں کو پاکستان کے راستے افغانستان بھیجنے کا منصوبہ بنایا جا رہا ہے۔
افغان شہریوں کی امریکہ منتقلی میں مدد کرنے والی تنظیم افغان ایویک کے مطابق اس گروپ میں ان افغان شہریوں کے اہل خانہ بھی شامل تھے، جنہوں نے کابل پر افغان حکومت کے موجودہ حکام کے قبضے سے قبل امریکی فوج کے ساتھ کام کیا تھا۔
عدالتی فیصلے کے بعد افغان ایویک کے صدر شان وان ڈائیور نے کہا کہ اس معاملے کو رکوانے میں سابق فوجیوں، انسانی حقوق کے کارکنوں، امریکی کانگریس کے 66 ارکان اور ہزاروں شہریوں نے کردار ادا کیا۔
افغان حکومت نے بھی ملک بدری کے مبینہ منصوبے پر شدید تشویش کا اظہار کیا تھا۔ 2021 میں اقتدار سنبھالنے کے بعد افغان حکام نے سابق مخالفین کے لیے عام معافی کا اعلان کیا تھا اور متعدد بار یقین دہانی کرائی کہ وہ بحفاظت وطن واپس آ سکتے ہیں۔ تاہم اقوام متحدہ نے ماورائے عدالت قتل، حراست اور بدسلوکی کے واقعات سے متعلق رپورٹس ریکارڈ کی ہیں۔
دوسری جانب پاکستان نے رواں سال کے آغاز میں بغیر ویزا مقیم افغان شہریوں کے خلاف کارروائی کی ہدایت کی تھی۔ یہ اقدام افغان شہریوں کی واپسی سے متعلق پہلے سے جاری پالیسی کا حصہ ہے، جس کے تحت بڑی تعداد میں افغان شہریوں کو واپس بھیجا جا چکا ہے۔
