اسلام آباد (پاک ٹوڈے): وفاقی وزیر خزانہ سینیٹر محمد اورنگزیب نے تصدیق کی ہے کہ سعودی عرب نے پاکستان کا 3 ارب ڈالر کا قرض رول اوور کردیا ہے، جس سے فوری طور پر قرض کی واپسی کا معاملہ مؤخر ہوگیا ہے۔
پارلیمنٹ ہاؤس میں میڈیا سے گفتگو کرتے ہوئے وزیر خزانہ نے کہا کہ ان کی سعودی وزیر خزانہ کے ساتھ بھی اچھی ملاقات ہوئی ہے۔ ان کے مطابق پاکستان اور سعودی عرب کے درمیان مضبوط تعلقات کے باعث اس معاملے پر پریشان ہونے کی ضرورت نہیں۔
محمد اورنگزیب کا کہنا تھا کہ فی الحال سعودی عرب سے مزید مالی معاونت کی ضرورت نہیں، کیونکہ پاکستان کے پاس تین ماہ کے درآمدی اخراجات پورے کرنے کے لیے زرمبادلہ کے ذخائر موجود ہیں۔
انہوں نے بتایا کہ پاکستان کو ہر سال تقریباً ڈیڑھ ارب یورو کے یورو بانڈز کی ادائیگی کرنا ہوتی ہے اور حکومت کی کوشش ہے کہ ان ادائیگیوں کے انتظام میں کوئی مشکل پیش نہ آئے۔
وزیر خزانہ نے مزید کہا کہ آئی ایم ایف کے بورڈ سے پروگرام کی اگلی قسط کی منظوری دسمبر میں ہونے کا امکان ہے۔
