طورخم بارڈر کے ذریعے افغانستان کے لیے اقوام متحدہ کی انسانی امداد منتقل

​اسلام آباد (پاک ٹوڈے): پاکستان نے طورخم کراسنگ کے ذریعے اقوام متحدہ کے 700 سے زائد امدادی ٹرکوں کو افغانستان داخل ہونے کی اجازت دے دی ہے، تاکہ سرحد پار شدید معاشی و انسانی بحران کا شکار خاندانوں تک ضروری سامان پہنچایا جا سکے۔

​اقوام متحدہ کے پاکستان میں ہیومینیٹیرین کوآرڈینیٹر محمد یحییٰ کے مطابق، طورخم کے راستے 724 امدادی ٹرک افغانستان پہنچ چکے ہیں۔ انہوں نے اس راہداری کو کھلا رکھنے پر حکومتِ پاکستان کا شکریہ ادا کیا۔ نائب وزیر اعظم اور وزیرِ خارجہ اسحاق ڈار نے بھی اس بات کی تصدیق کی کہ پاکستان نے اس انسانی مشن کو مکمل کرنے میں ضروری سہولت کاری فراہم کی ہے۔

​سیکیورٹی کشیدگی اور سرحدی جھڑپوں کے باعث اکتوبر 2025ء سے تجارتی راستے اور افغان ٹرانزٹ کارگو کی آمد و رفت متاثر تھی، تاہم عالمی اداروں کی اپیل پر محض انسانی بنیادوں پر امدادی سامان کی ترسیل کے لیے یہ گزرگاہ فراہم کی گئی۔