دبئی سے تل ابیب جانے والی پرواز میں پائلٹ کا ساتھی پر چاقو سے حملہ، طیارہ سعودی عرب اتار لیا گیا

دبئی (پاک ٹوڈے): دبئی سے تل ابیب جانے والی مسافر پرواز میں دوران پرواز ایک پائلٹ کی جانب سے اپنے ساتھی پائلٹ پر مبینہ طور پر چاقو سے حملے کا واقعہ پیش آیا، جس کے بعد طیارے کا رخ تبدیل کرکے اسے سعودی عرب کے شہر تبوک کی طرف لے جایا گیا۔

رپورٹ کے مطابق پرواز کے دوران طیارے کی بلندی اچانک تقریباً 17 ہزار فٹ کم ہوگئی۔ پرواز کے اعداد و شمار کے مطابق یہ کمی 2 منٹ سے بھی کم وقت میں ہوئی، جس کے بعد طیارے کا رخ سعودی عرب کی جانب موڑ دیا گیا۔

طیارے میں موجود ایک مسافر کے مطابق واقعے کے دوران کاک پٹ سے چیخ و پکار کی آوازیں آئیں، جس پر چند مسافر کاک پٹ کی جانب گئے اور وہاں موجود حملہ آور کو قابو کرنے میں مدد کی۔

اسرائیلی وزیراعظم نیتن یاہو نے واقعے کی تصدیق کرتے ہوئے کہا کہ ایک پائلٹ نے اپنے ساتھی کو چاقو مارنے کے بعد بظاہر طیارہ گرانے کی کوشش کی۔ ان کے مطابق مسافروں اور عملے کی بروقت کارروائی سے بڑے سانحے کو روکا گیا۔

سعودی حکام کے مطابق دونوں پائلٹ زخمی ہوئے اور انہیں طبی امداد کے لیے اسپتال منتقل کیا گیا، جبکہ طیارے میں سوار تمام مسافروں کے محفوظ ہونے کی تصدیق کی گئی ہے۔

ابتدائی اطلاعات کے مطابق واقعے کو طیارہ ہائی جیک کرنے کے بجائے پائلٹوں کے درمیان پیش آنے والے سنگین تنازع کے طور پر دیکھا جا رہا ہے۔ تاہم اسرائیلی حکام واقعے کے تمام پہلوؤں کی تحقیقات کر رہے ہیں اور پائلٹ کی نیت سمیت مختلف امکانات کا جائزہ لیا جا رہا ہے۔

رپورٹ کے مطابق واقعے کی بعض تفصیلات اور پائلٹوں کی شناخت سے متعلق مختلف اطلاعات سامنے آئی ہیں، اس لیے حکام کی حتمی رپورٹ کا انتظار ہے۔