اسلام الدین ساجد
اسلام آباد (پاک ٹوڈے) پاکستان پیپلز پارٹی کے چیئرمین بلاول بھٹو زرداری کی گزشتہ روز کی تقریر نے ملکی سیاست میں نئی ہلچل پیدا کردی ہے۔ انہوں نے نہ صرف حکومت کی معاشی پالیسیوں پر تنقید کی بلکہ عمران خان اور پاکستان تحریک انصاف (پی ٹی آئی) کے ساتھ ہونے والی مبینہ ناانصافیوں، 2024 کے عام انتخابات، مخصوص نشستوں سے متعلق فیصلے، آئینی ترامیم اور اسٹیبلشمنٹ کے کردار پر بھی اہم سوالات اٹھائے۔
بلاول کی تقریر کو اس لیے غیر معمولی اہمیت دی جارہی ہے کہ پیپلز پارٹی وفاقی حکومت کا حصہ ہے، لیکن ان کے بیانات بظاہر ان فیصلوں اور سیاسی اقدامات پر تنقید ہیں جن میں خود ان کی جماعت بھی شریک رہی ہے۔
سیاسی حلقوں میں یہ سوال اٹھ رہا ہے کہ کیا بلاول بھٹو نے حکومتی اتحاد سے فاصلہ اختیار کرنے کا اشارہ دے دیا ہے؟ کیا پیپلز پارٹی اسٹیبلشمنٹ کے بعض فیصلوں کے خلاف کھڑی ہونے جارہی ہے؟ اور کیا ان کے بیانات کے بعد نئے صوبوں کے قیام، ریفرنڈم اور آئینی ترامیم کا منصوبہ مشکلات سے دوچار ہوسکتا ہے؟
عمران خان کو سیاسی قیدی قرار دے کر بلاول نے نئی بحث چھیڑ دی
بلاول بھٹو نے نسبتاً کھل کر عمران خان اور ان کی جماعت کے ساتھ ہونے والی ناانصافیوں کا اعتراف کیا اور عمران خان کو سیاسی قیدی قرار دیا۔
انہوں نے پی ٹی آئی سے انتخابی نشان بلّا سپریم کورٹ کے فیصلے کے ذریعے واپس لیے جانے، پارٹی امیدواروں کو آزاد حیثیت میں انتخابات لڑنے پر مجبور کیے جانے اور فروری 2024 کے انتخابات کے نتائج پر سوالات اٹھاتے ہوئے کہا کہ عوام نے تحریک انصاف کو ووٹ دیا تھا۔
بلاول نے 2024 کے انتخابات کو درست قرار دینے کے بجائے ان میں مبینہ دھاندلی کی شفاف تحقیقات کی ضرورت پر زور دیا، جس سے ان کی اپنی جماعت کے انتخابی اور حکومتی کردار پر بھی سوالات پیدا ہوگئے۔
پی ٹی آئی کا مؤقف رہا ہے کہ اس نے 2024 کے انتخابات میں بھاری اکثریت سے کامیابی حاصل کی، لیکن انتخابی نتائج میں تبدیلی کرکے اسے حکومت بنانے سے محروم کردیا گیا۔ بلاول کی جانب سے عوامی مینڈیٹ اور انتخابی عمل پر سوالات اٹھانا اس بیانیے کو نئی سیاسی تقویت دے سکتا ہے۔
بلاول بھٹو نے سپریم کورٹ کی جانب سے تحریک انصاف کی مخصوص نشستیں دیگر جماعتوں میں تقسیم کرنے کے فیصلے پر بھی تنقید کرتے ہوئے اسے ناانصافی قرار دیا اور کہا کہ پی ٹی آئی کے ساتھ زیادتی ہوئی۔
یہ بیان اس لیے اہم ہے کہ مخصوص نشستوں کے معاملے پر سپریم کورٹ کے فیصلے کے بعد قومی اور صوبائی اسمبلیوں میں نشستوں کی تقسیم تبدیل ہوئی تھی، جس کے نتیجے میں مختلف جماعتوں کو مخصوص نشستیں ملیں، جن میں پیپلز پارٹی بھی شامل ہے۔
اب بلاول کی جانب سے اسی فیصلے کو ناانصافی قرار دینا ایک نئی سیاسی صورتحال پیدا کررہا ہے۔ تاہم انہوں نے یہ اعلان نہیں کیا کہ پیپلز پارٹی کو ملنے والی مخصوص نشستیں تحریک انصاف کو واپس کردی جائیں گی۔
یہی تضاد سیاسی بحث کا اہم موضوع بن گیا ہے کہ اگر پیپلز پارٹی سمجھتی ہے کہ تحریک انصاف کے ساتھ ناانصافی ہوئی تو کیا وہ اس فیصلے سے حاصل ہونے والے سیاسی فائدے کو بھی واپس کرنے کے لیے تیار ہوگی؟
27ویں آئینی ترمیم پر اعتراف نے دباؤ کے سوالات اٹھا دیے
بلاول بھٹو کی تقریر کا ایک اور اہم پہلو آئینی ترامیم کے حوالے سے ان کا اعتراف تھا کہ ماضی میں غلطیاں ہوئی ہیں۔ انہوں نے اعتراف کیا کہ گزشتہ سال کی آئینی ترمیم جبر کے تحت منظور کرائی گئی، جس کے ذریعے آئینی عدالت قائم کی گئی۔ مخالفین اس ترمیم کو عدلیہ کی آزادی سلب کرنے کے مترادف قرار دے رہے ہیں۔
ان کے بیان کے بعد یہ سوال اٹھنے لگا ہے کہ کیا آئینی ترامیم کی منظوری کے وقت سیاسی جماعتوں یا ارکان پارلیمنٹ پر دباؤ ڈالا گیا تھا؟ اگر ایسا تھا تو یہ دباؤ کس کی جانب سے تھا؟
بلاول نے اپنی تقریر میں اسٹیبلشمنٹ کا براہ راست نام نہیں لیا، لیکن ان کے متعدد بیانات کو طاقتور حلقوں کے لیے پیغام قرار دیا جارہا ہے۔
آئینی ترامیم، آئینی عدالت کے قیام، عدلیہ کے ڈھانچے میں تبدیلیوں اور سیاسی فیصلوں کے حوالے سے ان کے اعترافات نے ایک نئی بحث کو جنم دیا ہے۔
اسی تناظر میں حکومتی مشیر رانا ثناء اللہ نے سوال اٹھایا کہ اگر بلاول یہ کہہ رہے ہیں کہ آئینی ترامیم دباؤ کے تحت منظور ہوئیں تو وہ خود بھی ان ترامیم کی منظوری کے عمل میں شریک تھے۔ اس بیان کے بعد یہ بحث شروع ہوگئی کہ کیا بلاول کے اعترافات ان کے لیے سیاسی یا قانونی مشکلات پیدا کرسکتے ہیں؟
رانا ثناء اللہ کا کہنا ہے کہ یہ اعتراف بلاول کے لیے قومی اسمبلی کی رکنیت سے نااہلی کا سبب بھی بن سکتا ہے۔
نئے صوبوں اور ریفرنڈم کا منصوبہ بھی مشکلات سے دوچار
بلاول بھٹو نے سندھ کی تقسیم کی سخت مخالفت کرتے ہوئے اسے اپنی جماعت کی ریڈ لائن قرار دیا۔
انہوں نے واضح کیا کہ اگر ان پر یا ان کی جماعت پر سندھ کی تقسیم کے لیے دباؤ ڈالا گیا اور انہیں پارٹی ارکان کو اس حوالے سے ووٹ دینے کی ہدایت بھی کی گئی تو اس کے باوجود پیپلز پارٹی کے ارکان اس فیصلے کی مخالفت کریں گے۔
ان کے اس بیان کو نئے صوبوں کے قیام اور ریفرنڈم کے منصوبے کے لیے ایک بڑا سیاسی دھچکا قرار دیا جارہا ہے۔
سیاسی تجزیہ کاروں کے مطابق، اگر پیپلز پارٹی سندھ کی تقسیم کے خلاف سخت مؤقف اختیار کرتی ہے تو نئے صوبوں کے قیام کے لیے سیاسی اتفاق رائے پیدا کرنا مشکل ہوجائے گا، خصوصاً اگر اس معاملے کو ریفرنڈم کے ذریعے آگے بڑھانے کی کوشش کی جائے۔
بلاول نے مولانا فضل الرحمان کی اسٹیبلشمنٹ اور حکومت کے ساتھ جاری کشیدگی کے معاملے پر بھی ان کی کھل کر حمایت کی اور حکومت سے مطالبہ کیا کہ مولانا کے اٹھائے گئے سوالات کے جواب دیے جائیں۔
پیپلز پارٹی کے چیئرمین کی جانب سے مولانا فضل الرحمان اور تحریک انصاف کے مؤقف کے قریب آنا سیاسی طور پر اہم پیش رفت سمجھی جارہی ہے، کیونکہ اس سے حکومتی اتحاد کے اندر اختلافات اور اپوزیشن کے ساتھ ممکنہ سیاسی تعاون کے امکانات بڑھ سکتے ہیں۔
چوہدری غلام حسین: بلاول نے سیاسی نقصان کردیا، اب واپسی مشکل ہوگی
سینئر صحافی چوہدری غلام حسین نے اے آر وائی نیوز کے پروگرام میں گفتگو کرتے ہوئے کہا کہ بلاول بھٹو اپنی تقریر کے ذریعے جو سیاسی نقصان کرنا چاہتے تھے، وہ کرچکے ہیں۔ اب اگر وہ دباؤ کے تحت اپنے بیانات واپس بھی لے لیں تو بھی ان کی تقریر کے اثرات ختم نہیں ہوں گے۔
انہوں نے کہا کہ بلاول نے کئی اہم معاملات پر سیاسی حلقوں کو بے نقاب کردیا ہے اور اب صدر آصف علی زرداری کو چاہیے کہ تمام سیاسی قیدیوں کی رہائی کا حکم جاری کریں اور سیاسی جماعتوں کو ایک مشترکہ پالیسی کے تحت آگے بڑھنے کا راستہ دکھائیں۔
چوہدری غلام حسین نے دعویٰ کیا کہ وزیراعظم شہباز شریف بھی مستقبل قریب میں اسی نوعیت کا بیان دے سکتے ہیں، جس سے سیاسی صورتحال مزید پیچیدہ ہوجائے گی۔
اے آر وائی نیوز کے اسی پروگرام میں سابق گورنر سندھ محمد زبیر نے کہا کہ اگر بلاول بھٹو واقعی سمجھتے ہیں کہ تحریک انصاف کے ساتھ ناانصافی ہوئی ہے تو انہیں محض بیانات دینے کے بجائے عملی اقدامات بھی کرنے چاہئیں۔
انہوں نے تجویز دی کہ بلاول پیپلز پارٹی کو ملنے والی مخصوص نشستیں تحریک انصاف کو واپس کرنے کا اعلان کریں، خیبرپختونخوا میں پیپلز پارٹی کے گورنر سے مستعفی ہونے کا مطالبہ کریں اور صدر سے کہیں کہ تحریک انصاف کی صوبائی حکومت بحال کی جائے۔
محمد زبیر نے یہ بھی کہا کہ عمران خان کا نام لے کر ان کے ساتھ ہونے والی ناانصافیوں کی بات کرنا بلاول کا ایک اہم قدم ہے۔
انہوں نے دعویٰ کیا کہ اس وقت محسن نقوی ایک متبادل حکومت چلا رہے ہیں اور وزیراعظم شہباز شریف کا اس پر مؤثر کنٹرول نہیں۔ ان کے مطابق وزیراعظم کو یا تو محسن نقوی کو ہٹانا چاہیے یا خود مستعفی ہوجانا چاہیے۔
شرجیل میمن کا مؤقف: ماضی میں غلطیاں ہوئیں
جیو نیوز کے پروگرام میں پیپلز پارٹی کے سینئر رہنما اور سندھ کے وزیر اطلاعات شرجیل انعام میمن نے بلاول کے بیان کا دفاع کرتے ہوئے کہا کہ بلاول نے تسلیم کیا ہے کہ ماضی میں غلطیاں ہوئی ہیں۔
تاہم جب میزبان نے مخصوص نشستوں کے فیصلے کو بھی ان غلطیوں میں شامل کرنے کے بارے میں سوال کیا تو شرجیل میمن نے کہا کہ بلاول نے عمومی طور پر غلطیوں کا ذکر کیا ہے اور اس معاملے کو بھی ان میں شامل کیا جاسکتا ہے۔
اس گفتگو نے ایک بار پھر یہ سوال اٹھایا کہ کیا پیپلز پارٹی واقعی تحریک انصاف کو مخصوص نشستیں واپس کرنے کے لیے تیار ہے یا بلاول کا بیان محض سیاسی اور اصولی مؤقف تک محدود ہے؟
کیا پیپلز پارٹی اپوزیشن میں جاسکتی ہے؟
بلاول کی تقریر کے بعد سب سے اہم سوال پیپلز پارٹی اور مسلم لیگ (ن) کے اتحاد کے مستقبل سے متعلق ہے۔
اگر پیپلز پارٹی حکومتی اتحاد سے علیحدگی اختیار کرتی ہے یا اپوزیشن کے ساتھ مل کر حکومت کے خلاف مؤثر سیاسی محاذ بناتی ہے تو وفاقی حکومت کے لیے پارلیمانی معاملات چلانا مشکل ہوسکتا ہے۔
سیاسی تجزیہ کاروں کا خیال ہے کہ بلاول نے اپنے بیان کے ذریعے واضح پیغام دیا ہے کہ اگر سندھ کی تقسیم اور آئینی معاملات پر پیپلز پارٹی کو مجبور کرنے کی کوشش کی گئی تو وہ حکومتی اتحاد سے الگ راستہ اختیار کرسکتی ہے۔
تاہم یہ بھی ممکن ہے کہ بلاول کی تقریر حکومت سے علیحدگی کے بجائے سیاسی دباؤ بڑھانے، نئے صوبوں کے منصوبے کو روکنے اور پیپلز پارٹی کے لیے مذاکرات میں زیادہ گنجائش پیدا کرنے کی حکمت عملی ہو۔
بعض سیاسی حلقوں میں یہ رائے بھی پائی جاتی ہے کہ بلاول نے صدر آصف علی زرداری کی مشاورت یا اجازت سے یہ مؤقف اختیار کیا ہوگا تاکہ طاقتور حلقوں کو سندھ کی تقسیم کے معاملے پر واضح پیغام دیا جاسکے۔
آنے والے دن اہم، سیاسی مفاہمت یا نیا بحران؟
بلاول بھٹو کی تقریر نے پاکستان کی سیاست میں ایک نئی بحث شروع کردی ہے۔ عمران خان کے ساتھ ہونے والی مبینہ ناانصافیوں کا اعتراف، 2024 کے انتخابات پر سوالات، مخصوص نشستوں کے فیصلے پر تنقید، آئینی ترامیم کے حوالے سے بیانات اور سندھ کی تقسیم کی مخالفت ایسے معاملات ہیں جو حکومتی اتحاد اور سیاسی قوتوں کے درمیان تناؤ بڑھا سکتے ہیں۔
اگر صدر آصف علی زرداری اور دیگر سیاسی رہنما کوئی درمیانی راستہ نکالنے میں کامیاب ہوجاتے ہیں تو سیاسی مفاہمت، مذاکرات اور آئینی معاملات پر اتفاق رائے کی راہ کھل سکتی ہے۔
لیکن اگر پیپلز پارٹی اور مسلم لیگ (ن) کے درمیان اختلافات شدت اختیار کرتے ہیں اور نئے صوبوں یا آئینی تبدیلیوں کے معاملے پر دباؤ برقرار رہتا ہے تو پاکستان ایک نئے سیاسی بحران کی طرف بڑھ سکتا ہے۔
اب دیکھنا یہ ہے کہ بلاول بھٹو کی تقریر محض ایک سیاسی انتباہ ثابت ہوتی ہے یا واقعی پاکستان کی سیاست میں نئی صف بندی، حکومت اور اسٹیبلشمنٹ کے درمیان کشیدگی اور اپوزیشن کی مضبوطی کا آغاز بن جاتی ہے۔ آنے والے چند دن اس حوالے سے انتہائی اہم ہوسکتے ہیں۔
