پسنی (پاک ٹوڈے): بلوچستان کے ساحلی علاقے پسنی کے ساحل پر نایاب نسل کا ایک سبز سمندری کچھوا مردہ حالت میں برآمد ہوا ہے۔ ماہرین نے سمندری کچھوؤں کی بڑھتی ہوئی اموات پر تشویش کا اظہار کرتے ہوئے ان کی ہلاکتوں کی وجوہات جاننے کے لیے سائنسی بنیادوں پر تحقیقات کا مطالبہ کیا ہے۔
گوادر ڈیویلپمنٹ اتھارٹی کے ڈپٹی ڈائریکٹر ماحولیات عبدالرحیم نے پاک ٹوڈے کو بتایا کہ مردہ کچھوے کی گردن پر جال کی رسی کے نشانات پائے گئے ہیں، جس سے اس کے جال میں پھنسنے کا امکان ظاہر ہوتا ہے۔ ان کے مطابق ممنوعہ جالوں کا استعمال سمندری حیات کے لیے سنگین خطرہ بن رہا ہے۔
عبدالرحیم نے بتایا کہ پسنی، گوادر اور اورماڑہ کے ساحلی علاقوں میں یہ نایاب کچھوے پائے جاتے ہیں، جہاں انہیں پلاسٹک کی آلودگی، زہریلے فضلے اور غیر قانونی ماہی گیری سمیت متعدد خطرات کا سامنا ہے۔
ان کے مطابق مکران کے ساحل پر سالانہ تقریباً 60 سے 70 سمندری کچھوے مردہ حالت میں ملتے ہیں، تاہم یہ تعداد صرف ان واقعات پر مشتمل ہے جو انسانی آبادی کے قریب سامنے آتے ہیں۔ ساحل کے دور دراز علاقوں میں ہونے والی اموات کے باعث اصل تعداد اس سے زیادہ بھی ہو سکتی ہے۔
ڈپٹی ڈائریکٹر ماحولیات نے بتایا کہ سبز سمندری کچھوے ریت میں انڈے دیتے ہیں، لیکن ان کی افزائش کی شرح انتہائی کم ہے اور ہزار انڈوں میں سے بمشکل ایک کچھوا بالغ ہونے کے مرحلے تک پہنچ پاتا ہے۔ ان کے مطابق یہ کچھوے سانس لینے کے لیے وقفے وقفے سے سمندر کی سطح پر آتے ہیں، لیکن جالوں میں پھنسنے کے باعث پانی سے باہر نہیں نکل پاتے اور ڈوب کر ہلاک ہو سکتے ہیں۔
سمندری حیات کے ماہر ظریف بلوچ نے بھی سبز سمندری کچھوؤں کی اموات میں اضافے کو تشویشناک قرار دیا۔ ان کا کہنا تھا کہ ماہی گیری کے جالوں میں پھنسنا اور سمندر میں پلاسٹک کی آلودگی ان کی ہلاکتوں کی ممکنہ وجوہات ہیں۔
ظریف بلوچ نے مطالبہ کیا کہ کچھوؤں کی اموات کی اصل وجوہات جاننے کے لیے سائنسی تحقیقات کی جائیں اور ماہی گیروں کو بھی تحفظ کے اقدامات میں شامل کیا جائے۔ انہوں نے کہا کہ ماہی گیروں کو کچھوؤں کی بروقت شناخت، جالوں سے بحفاظت نکالنے اور انہیں بچانے کے طریقوں سے متعلق آگاہی دینا ضروری ہے۔
ماہرین نے خبردار کیا ہے کہ اگر ممنوعہ جالوں کے استعمال اور سمندری آلودگی پر قابو پانے کے لیے مؤثر اقدامات نہ کیے گئے تو سبز سمندری کچھوؤں کی بقا کو مزید خطرات لاحق ہو سکتے ہیں۔
