تل ابیب (پاک ٹوڈے): اسرائیل کے اپوزیشن رہنما گادی آئزنکوٹ نے انتخابی عمل میں وزیراعظم بینجمن نیتن یاہو کے دفتر کی مبینہ مداخلت کے الزامات سامنے آنے کے بعد مطالبہ کیا ہے کہ نیتن یاہو مزید ایک منٹ بھی حکومت کی سربراہی میں نہ رہیں۔
آئزنکوٹ نے نیتن یاہو اور ان کے قریبی ساتھیوں کے اقدامات کو اسرائیلی جمہوریت کے لیے براہِ راست خطرہ قرار دیتے ہوئے معاملے کی فوری تحقیقات کا مطالبہ کیا ہے۔
انتخابی مداخلت کے الزامات سامنے آنے کے بعد آئزنکوٹ نے کہا ہے کہ نیتن یاہو اور ان کے قریبی ساتھیوں کا طرزِ عمل اسرائیلی جمہوریت کے لیے براہِ راست خطرہ ہے۔ انہوں نے معاملے کی فوری تحقیقات اور پولیس و داخلی سلامتی کے ادارے سے سامنے آنے والی اطلاعات کی وضاحت کا مطالبہ کیا ہے۔
اسرائیلی میڈیا کی رپورٹ کے مطابق نیتن یاہو کے چیف آف اسٹاف پر الزام ہے کہ انہوں نے انتخابات سے ایک روز قبل عرب جماعت رعم کے کارکنوں کے خلاف ووٹ خریدنے کی شکایت پولیس تک پہنچائی، جس کے بعد تین افراد کو گرفتار کیا گیا۔ تاہم پولیس نے بعد میں فراہم کردہ معلومات کو بے بنیاد قرار دیتے ہوئے تینوں افراد کو رہا کر دیا۔
نیتن یاہو کے دفتر نے ان الزامات کی تردید کرتے ہوئے کہا ہے کہ چیف آف اسٹاف نے ایک شہری کی جانب سے موصول ہونے والی معلومات پولیس تک پہنچا کر اپنی ذمہ داری ادا کی۔ حکمران جماعت لیکوڈ نے بھی آئزنکوٹ کے بیان کو اشتعال انگیزی قرار دیا ہے۔
اسرائیل میں یہ سیاسی تنازع ایسے وقت میں سامنے آیا ہے جب صدر اسحاق ہرزوگ نے گادی آئزنکوٹ کو نئی حکومت تشکیل دینے کا موقع دیا ہے۔ تاہم اکتوبر کے انتخابات کے بعد نہ نیتن یاہو کا اتحاد اور نہ ہی آئزنکوٹ کا سیاسی اتحاد حکومت بنانے کے لیے پارلیمنٹ کی مطلوبہ 61 نشستیں حاصل کر سکا ہے۔
