جارجیا (پاک ٹوڈے): امریکی ریاست جارجیا کے شہر میکن میں سالگرہ کی ایک بڑی محفل کے دوران فائرنگ کے نتیجے میں 11 نوجوان زخمی ہوگئے، جن میں سے 2 کی حالت تشویشناک بتائی گئی ہے۔
میڈیا رپورٹس کے مطابق فائرنگ پیر کی رات تقریباً 12 بجے کیرولن کریٹن پارک میں ہوئی، جو اٹلانٹا سے تقریباً 85 میل جنوب مشرق میں واقع ہے۔ بب کاؤنٹی شیرف آفس کے مطابق پارک میں منعقد ہونے والی یہ محفل پہلے کسی اور مقام پر منعقد کرنے کی منصوبہ بندی کی گئی تھی، تاہم بعد میں اسے پارک منتقل کردیا گیا۔
حکام کے مطابق زخمیوں میں 4 نوجوان، 2 لڑکیاں اور 5 لڑکے شامل ہیں، جن کی عمریں 17 اور 18 سال ہیں۔ زخمیوں میں ایک 18 سالہ نوجوان اور ایک 17 سالہ لڑکا تشویشناک حالت میں ہیں، جبکہ دیگر 9 زخمیوں کی حالت مستحکم ہے۔
شیرف ڈیوڈ ڈیوس کے مطابق بعد میں ایک اور گروہ محفل میں پہنچا، جس کے بعد دونوں گروہوں کے درمیان جھگڑا ہوا اور معاملہ فائرنگ تک جا پہنچا۔ تمام 11 زخمی سالگرہ کی محفل میں موجود گروہ سے تعلق رکھتے تھے۔
پولیس کے مطابق واقعے میں اب تک کوئی گرفتاری عمل میں نہیں آئی جبکہ تحقیقات جاری ہیں۔ ایف بی آئی بھی تحقیقات میں معاونت کر رہا ہے، تاہم ابتدائی شواہد کے مطابق واقعہ مقامی نوعیت کا ہے۔
