ہیملٹن (پاک ٹوڈے): نیوزی لینڈ نے پانچویں ٹی 20 انٹرنیشنل میچ میں بھارت کو 7 وکٹوں سے شکست دے دی۔ میزبان ٹیم نے 192 رنز کا ہدف 18 اوورز میں 3 وکٹوں کے نقصان پر حاصل کرلیا۔
ہیملٹن میں کھیلے گئے میچ میں بھارت نے پہلے بیٹنگ کرتے ہوئے مقررہ 20 اوورز میں 8 وکٹوں کے نقصان پر 191 رنز بنائے۔ ایشان کشن نے 32 گیندوں پر 61 رنز کی جارحانہ اننگز کھیلی، جس میں 5 چوکے اور 5 چھکے شامل تھے، جبکہ کپتان شریاس آئر نے 23 گیندوں پر 50 رنز بنائے۔ ان کی اننگز میں 3 چوکے اور 4 چھکے شامل تھے۔ نمن دھیر 33 اور نتیش کمار ریڈی 22 رنز بنا کر نمایاں رہے۔
نیوزی لینڈ کی جانب سے ایڈم ملنے نے عمدہ بولنگ کرتے ہوئے 4 اوورز میں 19 رنز دے کر 4 وکٹیں حاصل کیں، جبکہ نیتھن اسمتھ اور بلیئر ٹکنر نے 2، 2 کھلاڑیوں کو آؤٹ کیا۔
جواب میں نیوزی لینڈ نے جارحانہ بیٹنگ کرتے ہوئے ہدف 18 اوورز میں 3 وکٹوں کے نقصان پر حاصل کرلیا۔ ٹم سیفرٹ نے 50 گیندوں پر 93 رنز بنائے، جن میں 11 چوکے اور 5 چھکے شامل تھے۔ گلین فلپس 38 گیندوں پر 65 رنز بنا کر ناٹ آؤٹ رہے، جبکہ ڈیرل مچل نے 16 گیندوں پر 29 رنز اسکور کیے۔
بھارت کی جانب سے ارشدیپ سنگھ، ورون چکرورتی اور نتیش کمار ریڈی نے ایک، ایک وکٹ حاصل کی۔
واضح رہے کہ پانچ میچوں کی سیریز بھارت نے 3-2 سے جیتی۔ بھارت نے ابتدائی تین میچوں میں کامیابی حاصل کی، جبکہ نیوزی لینڈ نے چوتھا اور پانچواں میچ جیتا۔
