کراچی (پاک ٹوڈے): صوبائی دارالحکومت کراچی میں یونیورسٹی روڈ کے قریب زیرِ زمین الیکٹرک کیبلز کے گڑھے میں اچانک آگ بھڑک اٹھی، جس کے نتیجے میں ایک شخص جھلس کر جاں بحق ہو گیا۔ موقع پر پہنچنے والے ریسکیو حکام کو گڑھے کے اندر سے جلی ہوئی لاش کے ساتھ بجلی کے آلات بھی ملے۔
تفصیلات کے مطابق حادثہ پی آئی بی کالونی کے علاقے میں فیضانِ مدینہ مسجد کے نزدیک عسکری پارک کے گیٹ نمبر 1 کے پاس پیش آیا، جہاں زیرِ زمین ہائی ٹینشن (ایچ ٹی) کیبلز کے لیے کھودے گئے گڑھے میں اچانک شدید آگ لگ گئی۔
ترجمان ریسکیو 1122 سندھ کے مطابق واقعے کی اطلاع ملتے ہی فائر اینڈ ریسکیو ٹیموں کو فوری طور پر جائے وقوعہ کی جانب روانہ کیا گیا۔ ریسکیو اہکاران نے بروقت کارروائی کرتے ہوئے آگ پر مکمل قابو پا لیا اور علاقے میں کولنگ کا عمل مکمل کیا۔
ریسکیو حکام نے بتایا کہ آگ بجھانے کے بعد جب گڑھے کا معائنہ کیا گیا تو وہاں سے ایک شخص کی مکمل جلی ہوئی لاش برآمد ہوئی۔ متوفی کے پاس سے بجلی کے آلات اور اوزار بھی ملے ہیں، جس سے یہ اندیشہ ظاہر کیا جا رہا ہے کہ مذکورہ شخص زیرِ زمین کیبلز پر کسی قسم کا کام یا توڑ پھوڑ کر رہا تھا۔
ترجمان کے مطابق متوفی کی تاحال شناخت نہیں ہو سکی ہے۔ لاش کو ضابطے کی کارروائی اور شناخت کے عمل کے لیے اسپتال منتقل کر دیا گیا ہے، جبکہ پولیس نے واقعے کا نوٹس لیتے ہوئے تمام پہلوؤں سے تحقیقات کا آغاز کر دیا ہے۔
