اسلام آباد (پاک ٹوڈے): سوئس ادارے ‘برسن’ کی جانب سے جاری کردہ سال 2026 کی عالمی ‘اسپورٹس سٹیز رینکنگ’ میں امریکی شہر نیویارک دنیا کا بہترین اسپورٹس شہر قرار پایا ہے، جبکہ اس فہرست میں پاکستان کا کوئی بھی شہر جگہ بنانے میں ناکام رہا۔
رپورٹ کے مطابق نیویارک نے گزشتہ رینکنگ میں تیسری پوزیشن سے زبردست پیشرفت کرتے ہوئے پہلے نمبر پر قدم جما لیے ہیں۔ نیویارک کی رینکنگ میں اس نمایاں بہتری کی بڑی وجوہات این بی اے چیمپئن شپ اور فیفا ورلڈ کپ کے فائنل جیسے بڑے عالمی مقابلوں کی میزبانی کو قرار دیا گیا ہے۔
مسلسل تین سال تک پہلی پوزیشن پر براجمان رہنے والا فرانسیسی دارالحکومت پیرس اس بار دوسرے نمبر پر چلا گیا ہے، جبکہ امریکی شہر لاس اینجلس نے تیسری پوزیشن حاصل کی ہے۔ عالمی رینکنگ میں لندن چوتھے، میڈرڈ پانچویں، بارسلونا چھٹے، میلان ساتویں، اور سویٹزرلینڈ کا شہر لوزان آٹھویں نمبر پر موجود ہے۔ مانچسٹر دسویں، واشنگٹن 11ویں اور میامی 12ویں نمبر پر رہے۔
ایشیائی اور بالخصوص ایشیائے کوچک کے شہروں میں ٹوکیو 16ویں اور سڈنی 24ویں نمبر پر رہے۔ مشرقِ وسطیٰ اور جنوبی ایشیا کی بات کی جائے تو دبئی 29ویں، بھارتی شہر ممبئی 51ویں، نئی دہلی 65ویں، جبکہ سعودی دارالحکومت ریاض 68ویں نمبر پر ہے۔ کیپ ٹاؤن 85ویں، جدہ 98ویں اور ساپورو 99ویں نمبر پر آئے۔
سوئس ادارے برسن کی اس رینکنگ کی تیاری میں دنیا بھر کے اسپورٹس ماہرین، کھیل صحافیوں اور بین الاقوامی اسپورٹس لیڈرز کی آرا کے ساتھ ساتھ گلوبل میڈیا اور سوشل میڈیا کوریج کے تفصیلی تجزیے کو بھی شامل کیا گیا ہے۔ فہرست میں دنیا کے 100 طاقتور ترین اسپورٹس شہروں کو شامل کیا گیا تھا، تاہم بنیادی انفراسٹرکچر اور بین الاقوامی ایونٹس کی عدم میزبانی کے باعث پاکستان کا کوئی شہر اس میں شامل نہ ہو سکا۔
