مظفرگڑھ (پاک ٹوڈے): رنگ پور میں مبینہ بدفعلی کا شکار ہونے والا 15 سالہ نوجوان ہسپتال میں علاج کے دوران دم توڑ گیا۔ پولیس نے واقعے کی تحقیقات کے دائرہ کار کو وسیع کرتے ہوئے قانونی کارروائی تیز کر دی ہے۔
پولیس ترجمان کے مطابق، 15 سالہ لڑکے کے ساتھ 22 اگست کو اسلحے کے زور پر مبینہ بدفعلی کا واقعہ پیش آیا تھا، جس کا مقدمہ متاثرہ فریق کی مدعیت میں 28 اگست کو درج کیا گیا تھا۔ پولیس حکام کا کہنا ہے کہ نامزد ملزم کو فوری طور پر گرفتار کر لیا گیا تھا جو اس وقت تحویل میں ہے۔
ڈی پی او مظفرگڑھ کے مطابق، متوفی لڑکا پہلے سے گردوں کے عارضے میں بھی مبتلا تھا۔ نوجوان کی موت کی اصل اور حتمی وجہ کا تعین کرنے کے لیے میڈیکل بورڈ کے ذریعے پوسٹ مارٹم کروایا جا رہا ہے، جس کی رپورٹ سامنے آنے کے بعد کیس میں مزید دفعات شامل کی جائیں گی۔
پولیس نے یقین دہانی کرائی ہے کہ واقعے کی تمام پہلوؤں سے شفاف تحقیقات کی جا رہی ہیں اور قانونی تقاضے پورے کرتے ہوئے انصاف کی فراہمی یقینی بنائی جائے گی۔
