کراچی (پاک ٹوڈے): سابق وفاقی وزیر خزانہ مفتاح اسماعیل نے خبردار کیا ہے کہ حکومتی ناقص پالیسیوں اور بروقت فیصلے نہ کرنے کے باعث ملک میں گندم کا بڑا بحران پیدا ہونے کا خدشہ ہے، جبکہ آنے والے دنوں میں آٹے کی قیمت 200 روپے فی کلو یا اس سے بھی بڑھ سکتی ہے۔
اپنے بیان میں مفتاح اسماعیل نے کہا کہ کراچی میں گندم کی قیمت 157 روپے فی کلو تک پہنچ چکی ہے، حالانکہ کسانوں نے رواں سال اپریل اور مئی میں یہی گندم 65 روپے فی کلو سے بھی کم قیمت پر فروخت کی تھی۔ ان کے مطابق بیرون ملک سے درآمد کی جانے والی گندم کراچی پہنچنے تک تقریباً 95 روپے فی کلو پڑتی ہے۔
انہوں نے کہا کہ حکومت نے نہ تو بروقت گندم درآمد کی اور نہ ہی نجی شعبے کو درآمد کی اجازت دی۔ حکومت نجانے کن وجوہات کی بنا پر گندم کی درآمد اور برآمد کا عمل ٹریڈنگ کارپوریشن آف پاکستان (ٹی سی پی) کے ذریعے کرنا چاہتی ہے۔
مفتاح اسماعیل کا کہنا تھا کہ 10 لاکھ ٹن گندم درآمد کیے جانے کے باوجود ملک میں قلت برقرار ہے اور قیمتوں میں مسلسل اضافہ ہو رہا ہے۔ خدشہ ہے کہ عوامی احتجاج کے بعد حکومت مزید گندم درآمد کرنے کا فیصلہ کرے گی تو یہ گندم فروری یا مارچ میں پاکستان پہنچے گی۔
سابق وزیر خزانہ نے خبردار کیا کہ اگر درآمدی گندم مارچ یا اپریل میں سندھ اور پنجاب پہنچی تو مقامی منڈیوں میں قیمتیں گرنے کا خدشہ ہے، جس سے کسانوں کو نقصان اٹھانا پڑ سکتا ہے۔ ان کا کہنا تھا کہ حکومت کو مزید گندم درآمد کرنی ہے تو فوری اقدامات کرنا ہوں گے۔
انہوں نے مزید کہا کہ حکومت نے شوگر ملز مالکان کے مفادات کو ترجیح دیتے ہوئے انہیں چینی برآمد کرنے کی اجازت دی، جبکہ حکومتی نااہلی اور ذاتی مفادات پر مبنی فیصلوں کا خمیازہ عام صارفین بھگت رہے ہیں۔
مفتاح اسماعیل کے مطابق موجودہ صورتحال میں ریفائنریز، آئل مارکیٹنگ کمپنیاں اور شوگر ملز بھاری منافع کما رہی ہیں، جبکہ عوام مہنگائی اور اشیائے ضروریہ کی بڑھتی ہوئی قیمتوں کے بوجھ تلے دبے ہوئے ہیں۔
