دوحہ (پاک ٹوڈے): قطر اور جرمنی نے ایران سے مطالبہ کیا ہے کہ وہ یمن میں حوثیوں کو اسلحہ اور دیگر معاونت فراہم کرنا بند کرے، جبکہ اپنے جوہری پروگرام سے متعلق بین الاقوامی ذمہ داریاں پوری کرتے ہوئے عالمی جوہری توانائی ایجنسی (آئی اے ای اے) کے ساتھ مکمل تعاون بحال کرے۔
یہ مطالبات قطر اور جرمنی کے مشترکہ بیان میں سامنے آئے، جو امیرِ قطر شیخ تمیم بن حمد آل ثانی کے 20 اور 21 نومبر کو جرمنی کے سرکاری دورے کے موقع پر جاری کیا گیا۔
مشترکہ بیان میں دونوں ممالک نے ایران پر زور دیا کہ وہ جوہری عدم پھیلاؤ کے معاہدے اور آئی اے ای اے کے ساتھ جامع حفاظتی معاہدے کے تحت اپنی ذمہ داریاں پوری کرے۔ انہوں نے کہا کہ ایران کو اپنے جوہری پروگرام کے پُرامن مقاصد یقینی بنانے کے لیے ایجنسی کے ساتھ مکمل تعاون دوبارہ شروع کرنا چاہیے۔
قطر اور جرمنی نے تجارتی جہازوں کے خلاف ایران کے حملوں اور دھمکیوں کی بھی مذمت کی اور آبنائے ہرمز کی بندش یا وہاں آزادانہ جہاز رانی میں رکاوٹ ڈالنے والے کسی بھی اقدام کی مخالفت کی۔
بیان میں مزید کہا گیا کہ ایران کو جوہری ہتھیار تیار یا حاصل نہیں کرنے چاہییں۔ دونوں ممالک نے خطے میں بیلسٹک میزائلوں کے استعمال سے پیدا ہونے والے خطرات کے خاتمے پر بھی زور دیا۔
یہ مشترکہ مؤقف ایسے وقت میں سامنے آیا ہے جب قطر ایران اور امریکا کے درمیان جنگ کے خاتمے کے لیے ثالثی کی کوششوں میں کردار ادا کر رہا ہے، جبکہ ایران کے جوہری پروگرام اور آبنائے ہرمز میں جہاز رانی کی بحالی سے متعلق مذاکرات بھی جاری ہیں۔
