اسلام الدین ساجد
اسلام آباد (پاک ٹوڈے)۔ وزیراعظم کے مشیر برائے سیاسی امور رانا ثناء اللہ نے پاکستان پیپلز پارٹی کے چیئرمین بلاول بھٹو زرداری اور پارٹی کے دیگر ارکان پارلیمنٹ کو خبردار کیا ہے کہ اگر انہوں نے یہ اعتراف کیا کہ ان سے 27ویں آئینی ترمیم کے حق میں دباؤ کے تحت ووٹ لیا گیا تھا تو انہیں قومی اسمبلی کی رکنیت سے نااہلی کا سامنا کرنا پڑ سکتا ہے۔
اے آر وائی نیوز کے پروگرام میں گفتگو کرتے ہوئے رانا ثناء اللہ نے کہا کہ ہر رکن پارلیمنٹ حلف اٹھاتا ہے کہ وہ اپنے ضمیر اور آزادانہ فیصلے کے مطابق ووٹ دے گا۔ ان کے مطابق اگر کوئی رکن خود یہ تسلیم کرتا ہے کہ اس نے دباؤ کے تحت اپنا ووٹ استعمال کیا تو یہ اس کے پارلیمانی حلف کی خلاف ورزی تصور ہو سکتی ہے اور اس کے نتیجے میں نااہلی کا معاملہ بھی پیدا ہو سکتا ہے۔
ان کا یہ بیان بلاول بھٹو زرداری اور پیپلز پارٹی کے بعض رہنماؤں کے ان الزامات کے تناظر میں سامنے آیا ہے کہ 27ویں آئینی ترمیم کی منظوری کے دوران ان پر دباؤ ڈالا گیا اور ان سے اپنی مرضی کے خلاف ووٹ لیا گیا۔
رانا ثناء اللہ نے براہ راست بلاول بھٹو کا نام لے کر کسی قانونی کارروائی کا اعلان نہیں کیا، تاہم ان کے بیان کو پیپلز پارٹی کی قیادت کے لیے ایک واضح سیاسی انتباہ کے طور پر دیکھا جا رہا ہے۔
صدر زرداری اور وزیراعظم کی ملاقات، سیاسی کشیدگی کم کرنے کی کوشش
دوسری جانب وزیراعظم شہباز شریف اور صدر آصف علی زرداری کے درمیان گزشتہ شام ہونے والی ملاقات کے حوالے سے گفتگو کرتے ہوئے رانا ثناء اللہ نے کہا کہ وہ اس ملاقات میں موجود نہیں تھے، اس لیے انہیں اس کی تفصیلات کا براہ راست علم نہیں۔
تاہم ان کا خیال تھا کہ ملاقات میں بلاول بھٹو کے حالیہ بیانات اور 27ویں آئینی ترمیم کو متنازع بنانے کے معاملے پر ضرور بات ہوئی ہوگی۔
انہوں نے اشارہ دیا کہ وزیراعظم نے صدر زرداری سے درخواست کی ہوگی کہ وہ اپنے دونوں برخورداروں، بلاول بھٹو زرداری اور وفاقی وزیر محسن نقوی، کو تحمل کا مظاہرہ کرنے کا کہیں۔
رانا ثناء اللہ سمیت بعض پاکستانی سیاست دان محسن نقوی کو صدر زرداری کا منہ بولا بیٹا قرار دے رہے ہیں۔
رانا ثناء اللہ کے مطابق محسن نقوی نئے صوبوں کے قیام اور موجودہ نظام کے خاتمے یا اس کی ناکامی سے متعلق بیانات دے رہے ہیں، جبکہ بلاول بھٹو حکومت پر تنقید کر رہے ہیں۔
انہوں نے محسن نقوی کے نئے صوبوں سے متعلق بیانات کو نامناسب بحث قرار دیتے ہوئے کہا کہ اس معاملے پر ریفرنڈم کرانے یا کوئی حتمی فیصلہ کرنے کا اختیار پارلیمنٹ کے پاس ہے۔ ان کا کہنا تھا کہ محسن نقوی کو نظام کے خاتمے یا اس کے مفلوج ہونے سے متعلق بیانات پر کوئی حمایت حاصل نہیں ہوگی۔
بلاول کا نئے صوبوں اور ریفرنڈم سے متعلق مؤقف پر قائم رہنے کا فیصلہ
اے آر وائی نیوز کی رپورٹ کے مطابق وزیراعظم اور صدر کی ملاقات کے بعد آصف علی زرداری نے ایوان صدر میں پیپلز پارٹی کی اعلیٰ قیادت کا اجلاس طلب کیا، جس میں بلاول بھٹو کو بھی کراچی سے اسلام آباد بلایا گیا۔
رپورٹ کے مطابق اجلاس میں حکومت اور پیپلز پارٹی کے درمیان بڑھتی ہوئی کشیدگی کم کرنے کے امکانات پر غور کیا گیا۔ تاہم بلاول بھٹو نے نئے صوبوں کے قیام اور ریفرنڈم سے متعلق اپنے مؤقف سے پیچھے ہٹنے سے انکار کر دیا۔
ذرائع کے مطابق زرداری اور بلاول کے درمیان اس بات پر اتفاق ہوا کہ پارٹی اپنے مؤقف پر قائم رہے گی، جبکہ حکومت کے ساتھ آئندہ مذاکرات کے لیے آصف علی زرداری کو اختیار دیا گیا۔
علیم خان کی بھی نئے صوبوں کے قیام کی حمایت
ادھر استحکام پاکستان پارٹی کے سربراہ اور وفاقی وزیر عبدالعلیم خان نے بھی نئے صوبوں کے قیام کی حمایت کرتے ہوئے کہا ہے کہ اگر کراچی کے عوام چاہتے ہیں کہ ان کے لیے الگ صوبہ قائم کیا جائے تو ایسا ہونا چاہیے۔ اسی طرح اگر پنجاب کے عوام نئے صوبے کا مطالبہ کرتے ہیں تو وہاں بھی نئے صوبے بنائے جانے چاہئیں۔
انہوں نے کہا کہ عوام کو حقیقی ریلیف فراہم کرنے کے لیے انتظامی بنیادوں پر نئے صوبوں کا قیام ضروری ہو سکتا ہے۔
علیم خان نے پیپلز پارٹی کے مؤقف پر سوال اٹھاتے ہوئے کہا کہ جب 27ویں آئینی ترمیم کی منظوری کے وقت بلاول بھٹو نے حکومت کا ساتھ دیا تو اس وقت انہیں عدلیہ کی آزادی کیوں یاد نہیں آئی اور اب یہ معاملہ کیوں اٹھایا جا رہا ہے؟
انہوں نے پنجاب کی وزیراعلیٰ مریم نواز پر بھی تنقید کرتے ہوئے کہا کہ پنجاب میں صرف اپوزیشن ہی شکایات نہیں کر رہی بلکہ مسلم لیگ (ن) کے ارکان قومی اسمبلی بھی مسائل پر آواز اٹھا رہے ہیں۔
حکومت کی مفاہمت کی پیشکش، ریفرنڈم پر عوامی رائے لینے کا عندیہ وفاقی وزیر اطلاعات عطاء اللہ تارڑ نے حکومت اور پیپلز پارٹی کے درمیان کشیدگی کے حوالے سے کہا ہے کہ حکومت کا مؤقف واضح ہے اور وہ اس معاملے پر سیاسی مفاہمت چاہتی ہے۔
ان کے مطابق نئے صوبوں کے قیام کے معاملے پر عوامی رائے معلوم کی جانی چاہیے۔ اگر عوام کسی نئے صوبے کے قیام کے حق میں ہوں تو اس پر پیش رفت کی جا سکتی ہے، بصورت دیگر ایسا نہیں ہونا چاہیے۔
عطاء اللہ تارڑ نے کہا کہ آئین میں ریفرنڈم کے انعقاد سے متعلق واضح شق موجود ہے اور اہم قومی معاملات پر عوامی رائے حاصل کی جا سکتی ہے۔
پاکستان میں نئے صوبوں کے قیام، 27ویں آئینی ترمیم اور عدلیہ کی آزادی سے متعلق اختلافات نے حکمران اتحاد کے اندر سیاسی تناؤ بڑھا دیا ہے۔ خاص طور پر پیپلز پارٹی کی قیادت کے حالیہ بیانات نے حکومت اور اس کی اہم اتحادی جماعت کے درمیان اختلافات کو نمایاں کر دیا ہے۔
تجزیہ کاروں کے لیے اہم سوال یہ ہے کہ کیا صدر زرداری حکومت اور بلاول کے درمیان اختلافات ختم کرا سکیں گے یا نئے صوبوں اور 27ویں آئینی ترمیم کا تنازع حکمران اتحاد میں مزید دراڑیں پیدا کرے گا؟
