اسلام آباد (پاک ٹوڈے): جمعیت علمائے اسلام (ف) کے سربراہ مولانا فضل الرحمان نے حکومت کو خبردار کیا ہے کہ کارکنوں کے خلاف کارروائیاں بند نہ کی گئیں تو جماعت سڑکوں پر نکلے گی اور جیلیں بھرنے کے لیے بھی تیار ہے۔
کارکنوں سے خطاب کرتے ہوئے مولانا فضل الرحمان نے کہا کہ اگر حکومت نے اپنا رویہ تبدیل نہ کیا تو پہلے سڑکوں پر احتجاج کیا جائے گا اور پھر کارکن جیلوں میں جانے سے بھی گریز نہیں کریں گے۔ ان کا کہنا تھا کہ حکومت کی جیلیں ختم ہو جائیں گی لیکن ان کے کارکن ختم نہیں ہوں گے۔
مولانا فضل الرحمان نے کہا کہ ان کی جماعت سیاسی مقابلہ سیاسی میدان میں اور سیاسی انداز میں کرے گی۔ ان کے بقول جے یو آئی کے کارکن مشتعل مزاج نہیں بلکہ نظم و ضبط اور حکمت عملی کے ساتھ آگے بڑھتے ہیں۔
انہوں نے کارکنوں کو متحد رہنے اور ایک صف میں کھڑے ہونے کی ہدایت کرتے ہوئے کہا کہ جماعت اپنے سیاسی مؤقف سے پیچھے نہیں ہٹے گی۔
دوسری جانب جے یو آئی کے ترجمان اسلم غوری نے مولانا فضل الرحمان اور مولانا اسعد محمود کی سکیورٹی واپس لینے کے فیصلے پر اعتراض کرتے ہوئے اسے ناقابل قبول قرار دیا ہے۔ ان کا کہنا تھا کہ دونوں رہنماؤں کو سکیورٹی خطرات لاحق ہیں اور حکومت فوری طور پر سکیورٹی بحال کرے۔
