تیمور خان | پاک ٹوڈے
خیبرپختونخوا میں گورنر راج کے نفاذ کے بعد پولیس کے لیے مالی مراعات میں اضافے کا فیصلہ کیا گیا ہے۔ محکمہ خزانہ کی ابتدائی مخالفت کے باوجود پولیس کو رسک الاؤنس دینے اور قربانی دینے والے اہلکاروں کے لواحقین کو پلاٹس کے بجائے مارکیٹ ریٹ کے مطابق گھر کی خریداری یا تعمیر کے لیے نقد رقم فراہم کرنے پر اتفاق ہوگیا ہے۔ رسک الاؤنس کی مد میں صوبائی خزانے پر سالانہ 19 ارب 20 کروڑ روپے کا اضافی بوجھ پڑنے کا تخمینہ لگایا گیا ہے۔
ذرائع کے مطابق گورنر خیبرپختونخوا فیصل کریم کنڈی نے گورنر راج کے بعد پولیس کے لیے رسک الاؤنس اور قربانی دینے والے اہلکاروں کے لواحقین کو مالی معاونت سمیت گھر فراہم کرنے کا اعلان کیا تھا، تاہم محکمہ خزانہ نے ابتدائی طور پر ان تجاویز کی مخالفت کی۔ اس معاملے پر محکمہ خزانہ اور پولیس افسران کے درمیان ہونے والے ایک اجلاس میں تلخ جملوں کا تبادلہ بھی ہوا، تاہم بعد ازاں محکمہ خزانہ ان تجاویز پر رضامند ہوگیا۔
محکمہ خزانہ کے ایک افسر نے نام ظاہر نہ کرنے کی شرط پر بتایا کہ پولیس اہلکاروں کو رسک الاؤنس کی مد میں ماہانہ ایک ارب 60 کروڑ روپے ادا کیے جائیں گے، جو سالانہ 19 ارب 20 کروڑ روپے بنتے ہیں۔ ان کے مطابق اس وقت خیبرپختونخوا میں پولیس اہلکاروں کی مجموعی تعداد تقریباً ایک لاکھ 36 ہزار ہے۔
موجود دستاویزات کے مطابق معزول صوبائی حکومت نے خیبرپختونخوا کی پانچ ہاؤسنگ اسکیموں میں پولیس شہداء کے اہل خانہ کے لیے مجموعی طور پر 501 پلاٹس مختص کیے تھے، جن کی مجموعی مالیت 99 کروڑ 38 لاکھ 17 ہزار 240 روپے ظاہر کی گئی ہے۔ ان میں سے 409 پلاٹس میگا سٹی نوشہرہ میں مختص کیے گئے، جو مجموعی تعداد کا 81 فیصد بنتے ہیں۔
قربانی دینے والے اہلکاروں کے لواحقین کے لیے ہنگو ٹاؤن شپ میں 50، جلوزئی ہاؤسنگ اسکیم نوشہرہ میں 8، حویلیاں ٹاؤن شپ ایبٹ آباد میں 2، ڈنگرام ہاؤسنگ اسکیم سوات میں 32 جبکہ میگا سٹی نوشہرہ میں 409 پلاٹس مختص کیے گئے تھے۔ ان پلاٹس میں تین مرلے کے 95، پانچ مرلے کے 340 اور سات مرلے کے 66 پلاٹس شامل ہیں۔
تاہم اب مجوزہ پالیسی کے تحت شہداء کے لواحقین کو ہاؤسنگ اسکیموں میں پلاٹس دینے کے بجائے نقد رقم فراہم کی جائے گی، جس میں گھر کی خریداری یا تعمیر کے لیے زمین اور تعمیراتی اخراجات کی ادائیگی مارکیٹ ریٹ کی بنیاد پر کی جائے گی۔
قربانی دینے والے اہلکاروں کے لیے تین پیکجز
ذرائع کے مطابق پنجاب حکومت کے شہداء پیکج کی طرز پر خیبرپختونخوا میں بھی پولیس افسران اور اہلکاروں کے لیے تین مختلف کیٹیگریز پر مشتمل پیکج تیار کیا گیا ہے۔ ان پیکجز میں شدت پسندوں کے خلاف کارروائیوں، جرائم پیشہ عناصر کے ساتھ مقابلوں، ٹارگٹ کلنگ، امن و امان کی صورتحال اور دوران ڈیوٹی حادثات میں جان بحق ہونے والے اہلکاروں کے لواحقین کے لیے مالی معاونت اور دیگر مراعات شامل ہیں۔
ان میں رینک کے مطابق یکمشت مالی امداد، گھر کی خریداری کے لیے رقم، مکمل تنخواہ اور الاؤنسز، بچوں کی مفت تعلیم اور اہل خانہ کے لیے سرکاری ملازمت کی سہولت شامل ہے۔
پہلے پیکج کا اطلاق دہشت گردوں کے خلاف آپریشنز، بم دھماکوں اور ٹارگٹ کلنگ کے نتیجے میں شہید ہونے والے پولیس افسران اور اہلکاروں پر ہوگا۔ اس کیٹیگری میں شہداء کے لواحقین کو رینک کے مطابق یکمشت مالی امداد اور گھر کی خریداری کے لیے رقم فراہم کی جائے گی۔
پہلا پیکج
مجوزہ پیکج کے مطابق کانسٹیبل اور ہیڈ کانسٹیبل کے لواحقین کو ایک کروڑ روپے یکمشت جبکہ گھر کی خریداری کے لیے ایک کروڑ 35 لاکھ روپے دیے جائیں گے، یوں مجموعی رقم دو کروڑ 35 لاکھ روپے بنتی ہے۔ اسی طرح اے ایس آئی اور سب انسپکٹر کے لواحقین کے لیے مجموعی طور پر تین کروڑ روپے، انسپکٹر اور ڈی ایس پی کے لیے چار کروڑ روپے، ایس پی اور ایس ایس پی کے لیے چار کروڑ 80 لاکھ روپے جبکہ ڈی آئی جی اور اس سے اوپر کے افسران کے لیے چھ کروڑ روپے مقرر کیے گئے ہیں۔
اس کے علاوہ قربانی دینے والے اہلکاروں کے اہل خانہ کو متعلقہ اہلکار کی ریٹائرمنٹ کی مقررہ عمر تک مکمل تنخواہ، ترقیوں اور نظرثانی شدہ الاؤنسز سمیت تمام مراعات ملتی رہیں گی۔ شہداء کے بچوں کے پرائمری سے پوسٹ گریجویٹ سطح تک تعلیمی اخراجات بھی حکومت برداشت کرے گی۔
دوسرا پیکج
دوسرے پیکج کا اطلاق دوران ڈیوٹی جرائم پیشہ عناصر کے ساتھ مقابلوں، امن و امان کی صورتحال اور دنگا فساد کے دوران تشدد کے واقعات میں جان بحق ہونے والے پولیس اہلکاروں پر ہوگا۔ اس کے علاوہ ایسے پولیس افسران اور اہلکار بھی اس پیکج میں شامل ہوں گے جو جرائم پیشہ عناصر کی جانب سے اپنی سابقہ کارروائیوں کی بنیاد پر ٹارگٹ کلنگ کا نشانہ بنیں، خواہ یہ واقعہ دوران ملازمت پیش آئے یا ریٹائرمنٹ کے بعد، بشرطیکہ متعلقہ تحقیقات میں اس کی تصدیق ہوجائے۔
اس پیکج کے تحت کانسٹیبل اور ہیڈ کانسٹیبل کے لواحقین کو 35 لاکھ روپے یکمشت امداد اور گھر کی خریداری کے لیے ایک کروڑ 40 لاکھ روپے، یعنی مجموعی طور پر ایک کروڑ 75 لاکھ روپے فراہم کیے جائیں گے۔ اے ایس آئی اور سب انسپکٹر کے لیے مجموعی رقم دو کروڑ 25 لاکھ روپے، انسپکٹر اور ڈی ایس پی کے لیے تین کروڑ 10 لاکھ روپے، ایس پی اور ایس ایس پی کے لیے تین کروڑ 80 لاکھ روپے جبکہ ڈی آئی جی اور اس سے اوپر کے افسران کے لیے چھ کروڑ روپے مقرر کیے گئے ہیں۔
دوسرے پیکج کے تحت بھی قربانی دینے والے اہلکاروں کے اہل خانہ کو ریٹائرمنٹ کی مقررہ تاریخ تک مکمل تنخواہ، ترقیوں اور نظرثانی شدہ الاؤنسز کی ادائیگی جاری رہے گی۔ ریٹائرمنٹ کے بعد بیوہ قواعد کے مطابق مکمل پنشن کی حقدار ہوگی، جبکہ بچوں کو پرائمری سے پوسٹ گریجویٹ سطح تک مفت تعلیم فراہم کی جائے گی۔ تاہم ریٹائرمنٹ کے بعد ٹارگٹ کلنگ کا نشانہ بننے والے اہلکاروں کے لواحقین کا حق صرف یکمشت مالی امداد تک محدود ہوگا۔
تیسرا پیکج
تیسرے پیکج میں ایسے پولیس افسران اور اہلکار شامل ہوں گے جو فعال سرکاری ڈیوٹی کے دوران کسی حادثے میں جان بحق ہوجائیں۔ اس کیٹیگری میں شمولیت کے لیے کم از کم ایس پی رینک کے افسر کی جانب سے تحقیقات یا انکوائری کے ذریعے واقعے کی تصدیق ضروری ہوگی۔ دوران ڈیوٹی ٹریفک حادثات میں جان بحق ہونے والے ٹریفک پولیس اہلکار بھی اس پیکج میں شامل ہوں گے۔
اس پیکج کے تحت کانسٹیبل اور ہیڈ کانسٹیبل کے لواحقین کو 30 لاکھ روپے، اے ایس آئی اور سب انسپکٹر کے لواحقین کو 40 لاکھ روپے، انسپکٹر اور ڈی ایس پی کے لواحقین کو 45 لاکھ روپے، ایس پی اور ایس ایس پی کے لواحقین کو 50 لاکھ روپے جبکہ ڈی آئی جی اور اس سے اوپر کے افسران کے لواحقین کو 70 لاکھ روپے یکمشت مالی امداد دی جائے گی۔
اس کے علاوہ رینک کے مطابق ماہانہ مینٹیننس یا ٹرانسپورٹ الاؤنس بھی فراہم کیا جائے گا۔ اس مد میں کانسٹیبل اور ہیڈ کانسٹیبل کے لیے 15 ہزار روپے، اے ایس آئی اور سب انسپکٹر کے لیے 26 ہزار روپے، انسپکٹر اور ڈی ایس پی کے لیے 37 ہزار 500 روپے، ایس پی اور ایس ایس پی کے لیے 56 ہزار روپے جبکہ ڈی آئی جی اور اس سے اوپر کے افسران کے لیے 75 ہزار روپے مقرر کیے گئے ہیں۔
زخمی اہلکاروں اور اہل خانہ کے لیے مراعات
شہداء پیکج کے علاوہ دوران ڈیوٹی شدت پسندوں کے ساتھ مقابلوں یا بم دھماکوں میں زخمی ہونے والے پولیس اہلکاروں کے لیے بھی مالی معاونت رکھی گئی ہے۔ عارضی طور پر زخمی ہونے والے اہلکاروں کو دس لاکھ روپے تک امداد فراہم کی جائے گی، جبکہ مستقل معذوری کے باعث سروس سے فارغ ہونے والے اہلکاروں کو پہلے پیکج کے تحت 30 لاکھ روپے اور دوسرے پیکج کے تحت 20 لاکھ روپے تک مالی معاونت دی جائے گی۔
گورنر خیبرپختونخوا فیصل کریم کنڈی کے مطابق اس جنگ میں پولیس نے بہت قربانیاں دی ہیں اس لیے ان کی تنخواہوں میں اضافہ وقت کا تقاضا ہے جبکہ شہداء کے لواحقین کو بھی بڑا پیکج دیں گے۔
