لکی مروت (پاک ٹوڈے): لکی مروت میں پولیس نے تھانہ براگی کی حدود میں کارروائی کے دوران ایک خودکش حملہ آور کو ہلاک کرنے اور بارود سے بھری مزدہ گاڑی پکڑنے کا دعویٰ کیا ہے۔
پولیس کے مطابق اسے اطلاع ملی تھی کہ مزدہ گاڑی کے ذریعے بڑے پیمانے پر تباہی پھیلانے کی منصوبہ بندی کی گئی ہے، جس کے بعد علاقے میں گشت اور چیک پوسٹوں پر نگرانی بڑھا دی گئی تھی۔
پولیس کا کہنا ہے کہ گاڑی کی نشاندہی پر کارروائی کی گئی، جس کے دوران ایک خودکش حملہ آور ہلاک ہوگیا۔ واقعے کی اطلاع ملنے پر سی ٹی ڈی، مقامی پولیس اور کیو آر ایف کی نفری موقع پر پہنچ گئی، جبکہ بم ڈسپوزل اسکواڈ نے گاڑی کا معائنہ شروع کردیا۔
پولیس کے مطابق گاڑی میں موجود ڈرمز میں بڑی مقدار میں بارود ہونے کا شبہ ہے۔ ہلاک ہونے والے شخص کے افغان شہری ہونے کی اطلاعات ہیں، تاہم اس کی شناخت کا عمل جاری ہے۔
آئی جی خیبرپختونخوا ذوالفقار حمید نے پولیس کارروائی کو سراہتے ہوئے کہا ہے کہ بروقت اقدام سے بڑے نقصان کو روکا گیا اور متعدد قیمتی جانیں بچائی گئیں۔
