اسلام آباد (پاک ٹوڈے): امریکا نے پاکستان کے معدنیات کے شعبے میں سرمایہ کاری اور دوطرفہ شراکت داری کے عزم کا اعادہ کرتے ہوئے کہا ہے کہ اہم معدنیات کے شعبے میں تعاون ٹرمپ انتظامیہ کی اولین ترجیحات میں شامل ہے۔
پاکستان منرلز انویسٹمنٹ فورم کے موقع پر امریکی ناظم الامور نٹالی بیکر نے مختلف ملاقاتوں اور سرگرمیوں کے دوران کہا کہ امریکا پاکستان کے ساتھ مل کر اہم معدنیات کے شعبے میں موجود سرمایہ کاری کے مواقع سے فائدہ اٹھانے کے لیے تیار ہے۔ ان کے مطابق اس تعاون سے دونوں ممالک ترقی اور خوشحالی کی نئی راہیں تلاش کر سکتے ہیں۔
امریکی سفارتخانے کے ترجمان کین ہیرلسن نے بتایا کہ پاکستان کے معدنیات کے شعبے میں سرمایہ کاری کی خواہش مند امریکی کمپنیاں کان کنی، معدنیات کی پراسیسنگ اور ریفائننگ کے شعبوں میں عالمی معیار کی مہارت فراہم کریں گی۔
ترجمان کے مطابق امریکی سرمایہ کاری سے پاکستان میں روزگار کے نئے مواقع پیدا ہونے کے ساتھ مقامی شہریوں کو تربیت حاصل کرنے اور جدید مہارتیں سیکھنے کے مواقع بھی میسر آئیں گے۔ ٹرمپ انتظامیہ اہم معدنیات کے شعبے میں تعاون کو خصوصی اہمیت دے رہی ہے اور اسے اپنی اولین ترجیحات میں شامل کر رکھا ہے۔
دوسری جانب امریکی میرینز کی 251ویں سالگرہ بھی منائی گئی۔ امریکی سفارتخانے کے مطابق امریکی میرینز 1949 سے دنیا بھر میں امریکی سفارتی تنصیبات کی حفاظت کی ذمہ داریاں انجام دے رہے ہیں۔ اس موقع پر ان کی خدمات کو خراج تحسین پیش کیا گیا۔
