مستونگ (پاک ٹوڈے): بلوچستان کے ضلع مستونگ کے علاقے کنک میں فوجی کیمپ پر بارود سے بھری گاڑی کے ذریعے خودکش حملہ کیا گیا، جس کی ذمہ داری بلوچستان لبریشن آرمی (بی ایل اے) نے قبول کر لی ہے۔ تنظیم نے حملے میں 18 سیکیورٹی اہلکاروں کو مارنے کا دعویٰ کیا ہے۔
بی ایل اے کے ترجمان جیئند بلوچ کی جانب سے جاری بیان کے مطابق تنظیم کے خودکش دستے مجید بریگیڈ نے بارود سے بھری گاڑی فوجی کیمپ سے ٹکرائی، جس کے نتیجے میں زوردار دھماکا ہوا۔ تنظیم کا دعویٰ ہے کہ دھماکے کے بعد اس کے مسلح ارکان کیمپ میں داخل ہوئے اور سیکیورٹی اہلکاروں کے ساتھ جھڑپ ہوئی۔
بیان میں کہا گیا ہے کہ حملے میں کم از کم 18 اہلکار مارے گئے، جبکہ مزید جانی نقصان کا بھی امکان ہے۔
دوسری جانب سرکاری مؤقف کے حامی سوشل میڈیا اکاؤنٹس کے مطابق سیکیورٹی فورسز نے کارروائی کے دوران تین حملہ آوروں کو مار دیا۔ بعض غیر مصدقہ اطلاعات میں مجموعی طور پر چھ افراد کے مارے جانے کی اطلاع بھی سامنے آئی ہے۔
حملے میں جانی نقصان، زخمیوں اور فوجی کیمپ کو پہنچنے والے نقصان کی تاحال آزاد ذرائع سے تصدیق نہیں ہو سکی۔
