ایمسٹرڈیم (پاک ٹوڈے): انٹرنیشنل ہاکی فیڈریشن ورلڈ کپ میں چار مرتبہ کی عالمی چیمپئن پاکستان ہاکی ٹیم کا آغاز انتہائی مایوس کن رہا، جہاں افتتاحی میچ میں انگلینڈ نے قومی ٹیم کو 1-4 سے شکست دے دی۔
ایمسٹرڈیم میں کھیلے گئے اس مقابلے میں انگلش کھلاڑیوں نے شروع ہی سے جارحانہ کھیل کا مظاہرہ کیا اور میچ کے تمام چاروں کوارٹرز میں گول اسکور کیے۔ قومی ٹیم کے کھلاڑی حریف کے تابڑ توڑ حملوں کے سامنے بے بس نظر آئے اور پاکستان کی جانب سے واحد گول آخری کوارٹر میں افراز نے اسکور کیا۔
آٹھ برس کے طویل وقفے کے بعد عالمی کپ میں واپسی کرنے والی پاکستان ٹیم کو پول ‘ڈی’ میں رکھا گیا ہے، جہاں اس کے اگلے مقابلے روایتی حریف بھارت اور ویلز سے ہوں گے۔