پشاور (پاک ٹوڈے): گورنر خیبرپختونخوا فیصل کریم کنڈی کی زیرِ صدارت صوبائی ایڈوائزری کونسل کا اجلاس منعقد ہوا، جس میں صوبے کو درپیش چیلنجز، امن و امان کی صورتحال اور انتظامی امور پر گفتگو کی گئی۔ یہ کونسل صوبے میں ایمرجنسی اور گورنر راج کے نفاذ کے بعد وفاقی حکومت نے تشکیل دی ہے۔
اجلاس کے آغاز میں کونسل کے اراکین نے اپنا اور اپنے متعلقہ قلمدانوں کا تعارف کرایا۔ اس موقع پر گورنر فیصل کریم کنڈی نے اراکین کو مبارکباد دیتے ہوئے کہا کہ انہیں مختلف چیلنجز کا سامنا کرنا ہوگا۔ اراکین کو ان کے سپرد کیے گئے قلمدانوں کے بارے میں بریفنگ دی جائے گی اور متعلقہ امور سمجھنے کے لیے چند دن فراہم کیے جائیں گے۔
گورنر نے ہدایت کی کہ سرکاری امور تیزی سے آگے بڑھائے جائیں، کام بروقت مکمل کیے جائیں اور کرپشن کے خلاف زیرو ٹالرنس کی پالیسی اپنائی جائے۔ انہوں نے کہا کہ نئے اراکین کی کارکردگی ان کے پیشروؤں سے مختلف اور بہتر نظر آنی چاہیے۔
فیصل کریم کنڈی نے امن و امان کی بحالی کو صوبے کی اولین ترجیح قرار دیتے ہوئے کہا کہ اس مقصد کے لیے دوسرے صوبوں کے تجربات سے استفادہ کرنے میں ہچکچاہٹ نہیں ہونی چاہیے۔ ان کا کہنا تھا کہ امن قائم ہوگا تو سیاح بھی آئیں گے اور سرمایہ کار بھی صوبے کا رخ کریں گے۔ انہوں نے اراکین کو اپنی مکمل حمایت اور تعاون کی یقین دہانی بھی کرائی۔
اجلاس کے بعد گورنر نے صوبے کے عوام کے نام پیغام میں کہا کہ غیر معمولی حالات کے پیشِ نظر آئین کے تحت ضروری اقدامات کیے گئے ہیں۔ انہوں نے سیاسی الزام تراشی سے گریز کرنے کا اعلان کرتے ہوئے کہا کہ خیبرپختونخوا میں امن، تحفظ اور استحکام کی بحالی بنیادی مقصد ہے۔
گورنر فیصل کریم کنڈی نے کہا کہ صوبے کے عوام نے دہشت گردی کے باعث بھاری نقصان اٹھایا ہے اور اب انہیں امن کا حق ملنا چاہیے۔ ان کے مطابق دہشت گردی کے ساتھ ساتھ اس نظریے اور نیٹ ورک کے خلاف بھی کارروائی ضروری ہے جو دہشت گردی کو سہولت فراہم کرتا اور قانون کے نفاذ کو کمزور کرتا ہے۔
