شینزن (پاک ٹوڈے): چین، امریکا اور روس نے جوہری خطرات کم کرنے اور جوہری ہتھیاروں کے پھیلاؤ کو روکنے کے لیے مذاکرات جاری رکھنے پر اتفاق کیا ہے۔ تینوں ممالک کے سربراہان نے چین کے شہر شینزن میں پہلے سہ فریقی سربراہی اجلاس کے بعد مشترکہ ’امن اعلامیہ‘ بھی جاری کر دیا۔
اجلاس میں امریکی صدر ڈونلڈ ٹرمپ، روسی صدر ولادیمیر پوتن اور چینی صدر شی جن پنگ نے شرکت کی۔ مشترکہ اعلامیے کے مطابق تینوں رہنماؤں نے اسٹریٹجک استحکام اور بین الاقوامی سلامتی کے تحفظ کے عزم کا اظہار کیا۔
اعلامیے میں کہا گیا ہے کہ جوہری جنگ نہ جیتی جا سکتی ہے اور نہ ہی اسے لڑا جانا چاہیے۔ تینوں ممالک نے جوہری خطرات کم کرنے اور جوہری ہتھیاروں کے پھیلاؤ کی روک تھام کے لیے بات چیت پر بھی اتفاق کیا ہے۔ تاہم اعلامیے میں جوہری ہتھیاروں میں کمی کے لیے کسی مخصوص معاہدے یا عملی لائحہ عمل کی تفصیلات نہیں دی گئیں۔
تینوں ممالک نے اقوام متحدہ میں اصلاحات کے لیے کوششیں آگے بڑھانے کے عزم کا بھی اظہار کیا، تاکہ عالمی ادارہ بین الاقوامی چیلنجز سے زیادہ مؤثر انداز میں نمٹ سکے اور عالمی امن و سلامتی کے اپنے بنیادی مشن کو پورا کر سکے۔
مشترکہ اعلامیے میں ریاستی رضامندی کے اصول اور سرکاری عہدیداروں کو حاصل سفارتی استثنیٰ کے احترام کو اہم قرار دیا گیا، جبکہ کہا گیا کہ بین الاقوامی فوجداری عدالت (آئی سی سی) اور اس جیسے دیگر اداروں کو اپنے دائرہ اختیار کا ناجائز استعمال نہیں کرنا چاہیے۔
یہ شینزن اجلاس تینوں ممالک کے سربراہان کی پہلی براہِ راست سہ فریقی ملاقات ہے، جس میں عالمی سلامتی، جوہری ہتھیاروں اور بین الاقوامی امور پر تبادلہ خیال کیا گیا۔