پشاور (پاک ٹوڈے): پشاور کے علاقے دیر کالونی میں الخیر اسکول سسٹم کی چھت گرنے سے چار بچے جاں بحق ہوگئے، جبکہ طلبہ اور اساتذہ سمیت 20 افراد کو لیڈی ریڈنگ ہسپتال منتقل کیا گیا ہے۔
لیڈی ریڈنگ ہسپتال کے ترجمان محمد عاصم کے مطابق حادثے کے بعد اب تک 20 طلبہ اور اساتذہ کو ہسپتال پہنچایا جا چکا ہے، جن میں سے چار دم توڑ گئے۔ دیگر زخمیوں کو طبی امداد فراہم کی جا رہی ہے۔
ترجمان کے مطابق عمارت کے ملبے تلے مزید افراد کے دبے ہونے کا خدشہ ہے، جس کے باعث ہلاکتوں میں اضافے کا اندیشہ ظاہر کیا جا رہا ہے۔ واقعے کے بعد امدادی کارروائیاں جاری ہیں اور ریسکیو اہلکار ملبے تلے دبے افراد کو نکالنے کی کوشش کر رہے ہیں۔