اسلام آباد (پاک ٹوڈے): پاکستان کے 79 ویں یومِ آزادی کے موقع پر بین الاقوامی برادری بالخصوص امریکہ اور روس کے سفارتکاروں کی جانب سے پاکستانی قوم کو خصوصی مبارکباد پیش کی گئی ہے۔
پاکستان میں متعین امریکی ناظم الامور نیٹلی اے بیکر اور امریکی سفارتی مشن نے ایک جاری بیان میں تمام پاکستانیوں کو مبارکباد دیتے ہوئے یاد دلایا کہ قیامِ پاکستان کے فوراً بعد اسے تسلیم کرنے والے ابتدائی ممالک میں امریکہ شامل تھا۔ انہوں نے کہا کہ گزشتہ آٹھ دہائیوں میں دونوں ممالک کی دوستی اور شراکت داری مزید مستحکم ہوئی ہے اور امریکی مشن پاکستانی عوام کی امن، ترقی اور خوشحالی کے لیے پُرخلوص تمناؤں کا اظہار کرتا ہے۔
دوسری جانب، پاکستان میں روس کے سفیر نے بھی اپنے تہنیتی پیغام میں یومِ آزادی کو پاکستانی قوم کی جرات، غیر متزلزل عزم اور قوی جذبوں کا مظہر قرار دیا۔ ان کا کہنا تھا کہ روس پاکستان کے ساتھ باہمی افہام و تفہیم کو مضبوط کرنے اور دوطرفہ مفادات کے تمام شعبوں میں شراکت داری کو وسعت دینے کے لیے پرعزم ہے۔