اسلام آباد (پاک ٹوڈے): پاکستان نے تائیوان کی دو بڑی ایئرلائنز کے لیے اپنی فضائی حدود بند کرنے کا فیصلہ واپس لیتے ہوئے انہیں دوبارہ پاکستانی فضائی حدود استعمال کرنے کی اجازت دے دی ہے۔
پاکستان کی سول ایوی ایشن اتھارٹی نے ایوا ایئرویز اور چائنا ایئرلائنز کو 28 اکتوبر 2026 سے 27 مارچ 2027 تک پاکستانی فضائی حدود استعمال کرنے کی اجازت دی ہے۔
اس سے قبل وزیر دفاع خواجہ آصف نے کہا تھا کہ پاکستان کی ایوی ایشن ڈویژن چین کی ’ون چائنا پالیسی‘ پر عمل پیرا ہے، جس کے تحت صرف مین لینڈ چین کی ایئرلائنز کو پاکستانی فضائی حدود استعمال کرنے کی اجازت دی گئی تھی۔
پروازوں کے ٹریکنگ ڈیٹا کے مطابق دونوں تائیوانی ایئرلائنز نے 25 اکتوبر سے پاکستانی فضائی حدود کا استعمال بند کرکے اپنے راستے تبدیل کر لیے تھے۔ اس دوران ایشیا اور یورپ کے درمیان ان کی متعدد پروازوں نے روسی فضائی حدود استعمال کیں، جس سے سفر کا دورانیہ اور ایندھن کے اخراجات بڑھنے کا خدشہ پیدا ہوا۔
تائیوانی ایئرلائنز ایشیا اور یورپ کے درمیان پروازوں کے لیے پاکستانی فضائی حدود پر بڑی حد تک انحصار کرتی رہی ہیں۔ فضائی راستوں میں تبدیلی کے باعث ان پروازوں کے دورانیے میں کئی گھنٹوں کا اضافہ ہو سکتا تھا۔