اسلام آباد (پاک ٹوڈے): نادرا (نیشنل ڈیٹا بیس اینڈ رجسٹریشن اتھارٹی) نے مکمل طور پر پاکستان میں تیار کردہ جدید کیو آر کوڈ (QR Code) والا نیا قومی شناختی کارڈ باقاعدہ طور پر متعارف کروا دیا ہے۔
نئے ڈیزائن اور تکنیک کے حامل اس شناختی کارڈ میں روایت سے ہٹ کر روایتی مائیکرو چپ کے بجائے ایک انتہائی محفوظ کیو آر کوڈ شامل کیا گیا ہے۔ اس کیو آر کوڈ کو عام اسمارٹ فونز اور نادرا کی سرکاری ‘پاک آئی ڈی’ (Pak ID) موبائل ایپلی کیشن کی مدد سے آسانی سے اسکین اور تصدیق کیا جا سکے گا۔
نادرا حکام کے مطابق کیو آر کوڈ کے انضمام سے شہریوں کی بنیادی شناختی معلومات کی فوری جانچ اور تصدیقی عمل پہلے سے کہیں زیادہ تیز اور سادہ ہو جائے گا۔ اس کے ساتھ ساتھ، مختلف نجی و سرکاری اداروں کو بھی شہریوں کی تصدیق کے لیے ایک محفوظ اور موثر ڈیجیٹل سہولت میسر آئے گی۔