سرینگر (پاک ٹوڈے): بھارتی حکام نے دعویٰ کیا ہے کہ بھارت کے زیرِ انتظام کشمیر کے ضلع کولگام میں سکیورٹی فورسز کے ساتھ فائرنگ کے تبادلے میں لشکر طیبہ کا علاقائی کمانڈر لطیف بھٹ مارا گیا ہے۔
بھارتی پولیس کے مطابق سکیورٹی فورسز نے بدھ کے روز ضلع کولگام میں کارروائی کے دوران لطیف بھٹ کو ہلاک کیا۔ بھارتی حکام نے الزام عائد کیا کہ وہ رواں سال سکیورٹی فورسز پر ہونے والے متعدد حملوں میں ملوث تھا، جن میں گزشتہ ہفتے ایک نیم فوجی چوکی پر حملہ بھی شامل ہے، جس میں تین اہلکار زخمی ہوئے تھے۔
اس حملے کے بعد پولیس اور فوج نے ضلع کولگام کے متعدد دیہات کا محاصرہ کرکے تلاشی آپریشن شروع کیا تھا۔ بھارتی پولیس کے مطابق کارروائی کے دوران سینکڑوں مشتبہ افراد سے پوچھ گچھ کی گئی جبکہ کم از کم 20 افراد کو حراست میں لیا گیا۔
کولگام کے پولیس سربراہ عنایت علی نے بتایا کہ لطیف بھٹ نے ایک مسجد کے اندر پناہ لینے کے دوران ہتھیار ڈالنے کی اپیلیں مسترد کر دی تھیں۔ بھارتی فوج کے مطابق اہلکاروں نے اسے مسجد کے احاطے سے باہر نکلنے پر مجبور کیا، جس کے بعد فائرنگ کے تبادلے میں وہ مارا گیا۔
بھارتی وزیر داخلہ امیت شاہ نے سوشل میڈیا پر اپنے بیان میں لطیف بھٹ کو علاقے میں لشکر طیبہ کا آخری معلوم فعال مقامی عسکریت پسند قرار دیا۔
دوسری جانب مقبوضہ کشمیر کی سابق وزیر اعلیٰ محبوبہ مفتی نے کولگام میں بڑے پیمانے پر جاری سکیورٹی کارروائیوں پر تشویش کا اظہار کیا ہے۔ ان کا کہنا تھا کہ چند افراد کی کارروائیوں یا سکیورٹی کی ممکنہ کوتاہیوں کی سزا پوری آبادی کو دینا ناانصافی ہے اور اجتماعی کارروائیوں سے عوام میں نفرت اور ناراضی بڑھ سکتی ہے۔
واضح رہے کہ بھارت پاکستان پر مقبوضہ کشمیر میں سرگرم عسکریت پسند گروہوں کی معاونت کا الزام عائد کرتا ہے، جبکہ پاکستان ان الزامات کی تردید کرتا ہے۔
