بین الاقوامی ڈیسک (پاک ٹوڈے): صومالیہ کے ساحل کے قریب ایک بار پھر بحری قزاقی کی لہر ابھر کر سامنے آئی ہے، جہاں مسلح افراد نے کیمرون کے پرچم بردار جنرل کارگو جہاز ‘لوتوف’ کو اپنے قبضے میں لے لیا ہے۔
برطانوی میری ٹائم ٹریڈ آپریشنز کے مطابق یہ واقعہ صومالیہ کے علاقے مارییو کے قریب ساحل سے تقریباً چار بحری میل کے فاصلے پر پیش آیا، جہاں 8 مسلح افراد جہاز پر سوار ہوئے اور اس کا کنٹرول سنبھال لیا۔ میری ٹائم سیکیورٹی اداروں نے باضابطہ طور پر اس واقعے کو ‘ہائی جیکنگ’ قرار دیا ہے۔ 1,401 ڈیڈ ویٹ ٹن وزن کا حامل یہ تجارتی جہاز 1995 میں تیار کیا گیا تھا۔
حملہ آوروں کی شناخت اور ان کے مطالبات فی الحال سامنے نہیں آ سکے اور نہ ہی کسی گروپ نے اس کی ذمہ داری قبول کی ہے۔ عملے کی سلامتی کے حوالے سے بھی معتبر بحری اداروں کی جانب سے آزادانہ تصدیق کا انتظار ہے۔
رپورٹس کے مطابق رواں برس اپریل کے بعد ہارن آف افریقا کے خطے میں بحری قزاقی کا یہ کم از کم پانچواں واقعہ ہے، جس سے بین الاقوامی تجارتی راہداریوں کی سیکیورٹی کے حوالے سے نئے اور شدید خدشات جنم لے رہے ہیں۔
