دکی (پاک ٹوڈے): بلوچستان کے ضلع دکی کے علاقے نانا صاحب زیارت پلڑی میں نامعلوم مسلح افراد نے ایس ایم سی کنسٹرکشن کمپنی کے کیمپ پر حملہ کردیا۔
پولیس ذرائع کے مطابق تقریباً 40 سے 45 مسلح افراد نے کیمپ پر دھاوا بولا، فائرنگ کے نتیجے میں کمپنی کا ایک سیکیورٹی گارڈ موقع پر جاں بحق جبکہ ایک راہگیر سمیت 2 افراد زخمی ہوگئے۔
ذرائع کے مطابق مسلح افراد نے مزدوروں کے شناختی کارڈ چیک کرنے کے بعد 12 مزدوروں کو اغوا کرلیا۔ مغوی مزدوروں میں 10 کا تعلق پنجاب، ایک کا مقامی علاقے جبکہ ایک کا خیبرپختونخوا سے بتایا گیا ہے۔
پولیس ذرائع کا کہنا ہے کہ حملہ آور جاتے ہوئے کیمپ میں موجود بھاری مشینری اور 4 گاڑیوں کو بھی آگ لگا گئے۔
واقعے کی اطلاع ملتے ہی پولیس اور سیکیورٹی فورسز نے علاقے کو گھیرے میں لے لیا اور مغوی مزدوروں کی بازیابی سمیت حملہ آوروں کی تلاش کے لیے سرچ آپریشن شروع کردیا۔